【電影LOL】串流平台買起《教父》 上映30周年拍十集製作前傳

·2 分鐘文章

新冠疫情令好多行業出現新嘅營運模式,傳統戲院放映大受影響,反而串流平台生意越戰越勇,所以外國傳媒ViacomCBS決定重新包裝旗下串流平台,以「Paramount+」再出發!

ViacomCBS本身有唔少經典劇集及電影,影片藏量高達30,000套,當中最受歡迎就有Criminal Minds、The Good Fight、《星空奇遇記:發現號》等。不過佢地主打賣點係由2021年至2023年,將會獨家擁有神枱級黑幫經典、哥普拉執導嘅《教父》三部曲播映權!

《教父》系列面世30多年,影響力依然不減,有見及此,平台將會製作10集迷你劇集The Offer,圍繞《教父》監制Al Ruddy當年籌備及拍攝《教父》嘅幕後秘辛。

當年籌備過程一啲都唔簡單,好似哥普拉唔係導演首選,又有指電影公司最初極度反對馬龍白蘭度主演,幾番遊說之下先成就出榮獲奧斯卡「最佳電影」、「最佳男主角」、「最佳改編劇本」嘅經典電影!The Offer將會披露當年不為人知嘅幕後故事,絕對係一眾影迷嘅福音!

除咗迷你劇集The Offer,各位影迷年底仲可以睇到新版《教父3》。《教父》及續集《教父II》分別於1972年及1974年面世,隔咗16年、1990年先有《教父III》,據聞當年導演因為要還片債,於片廠要求下,匆匆籌備第3集,導致表現強差人意,同前兩集嘅評價可謂差天共地!

導演哥普拉似乎都唔滿意作品,所以決定今年推出《教父III》全新剪輯版-Mario Puzo’s The Godfather, Coda: The Death of Michael Corleone,新版會有全新嘅開頭及結尾,亦會重新處理部份畫面及聲音,導演接受訪問時表示新版會係個更合適嘅結局。

剪輯版暫定12月由Paramount於北美地區限量發行,之後會於串流平台播放,即係想睇《教父》就要訂閱「Paramount+」,紀念《教父》30周年又可以吸客,呢招勁吖!

更多電影文章

【電影LOL】《神奇女俠1984》改期聖誕上畫 戲院2個月冇大片撐場!

【電影LOL】華裔導演趙婷 威尼斯影展奪金獅獎 新作Nomadland奧斯卡大熱

【電影LOL】《花木蘭》被抵制 迪士尼補鑊回應︰鳴謝再教育營負責單位係慣常做法

【電影LOL】今個星期睇咩戲 《天能》《顫.役.前》《由菱開始》

【電影LOL】《花木蘭》又出事 片尾名單感謝再教育營負責單位 外國網友狠批迪士尼虛偽

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能