【電影LOL】事業愛情皆得意 奇洛李維斯轉性拍喜劇演騎呢中坑band友

·3 分鐘文章

心情持續低迷?一時三刻未能排解,不如睇下笑片轉移下視線。男神奇洛李維斯銀幕上型英帥靚正,現實生活中人品一流非常貼地,以往佢拍動作片以外經常演出悲情男主角,近年憑《殺神》事業再次大勇,加上感情生活順利,奇哥拍多咗好多喜劇!

上年客串美國棟篤女笑匠Ali Wong編劇兼主演、Netflix出品嘅Always Be My Maybe,唔睇都唔知奇哥咁玩得。為咗喜劇效果,佢於戲內以浮誇10倍嘅方法同Ali Wong談情,角色都係做返自己,不過戲內嘅佢非常扮嘢,強調自己著名牌之餘仲專食埋啲貴夾唔飽講多過食嘅分子料理,開口埋口都係乜主義物主義,擺明撩是鬥非!不過佢一出場又真係好驚喜又好好笑!

今年佢再下一城又拍喜劇,唔係客串,直頭擔正做男主角,拍返自己後生時做落嘅騎呢B級笑片Bill & Ted’s Excellent Adventure。電影第一集於1989年面世,當年佢同另一主角Alex Winter都青春到不得了,飾演為咗交功課而穿越時空搞搞震嘅傻更更少年,Bill & Ted合乎當時青春片格式大受歡迎,所以1991年有續集Bill & Ted’s Bogus Journey,繼續大玩穿越時空對付壞人!

Bill & Ted屬無厘頭搞笑片,當你以為往事不會重來,30年後居然可以原班人馬再次演出第3集Bill & Ted Face The Music!難得奇哥咁投入,繼續飾演Ted嘅佢,30年後同Winter飾演嘅Bill仲係好朋友,人到中年發福兼走樣嘅佢地未能兌現年輕時嘅承諾,以音樂連結世界,作為band友表演場地越玩越細,喺小餐廳對住幾丁友表演!

中年Bill同Ted無因為人大咗而變醒咗,做埋老豆都仲係懶懶閒,被提醒要寫首好歌貢獻世界,佢地無積極投入創作,反而走捷徑坐時光機搵未來嘅自己偷歌!電影剛剛出咗預告片同海報,睇片見到未來嘅Bill同Ted,唔知點解會變咗做超級大隻佬,仲要坐緊監?!

成個Bill & Ted系列無咩教育意義,最好睇就係睇奇哥不計形象娛樂大眾,不過對於16歲患有腎病嘅美國少女Emily嚟講,1989年嘅Bill & Ted係佢最愛電影,佢仲因為套戲封奇哥做偶像!美國慈善機構Make A Wish得知Emily希望可以見到偶像一面,主動聯絡奇哥,一向好人嘅奇洛李維斯二話不說即刻應承,仲帶埋Emily去Bill & Ted 3片場參觀!

睇奇洛李維斯飾演冷面型男睇得多,估唔到做喜劇都咁得,仲要個人好心地,男神當之無愧,亂世中對人性有返少少希望。

更多電影文章

【電影LOL】陳沖拍女排名將郎平紀錄片 國際上映前抽起 為咗賺人仔?

【電影LOL】《死因無可疑》林嘉欣自製殘樣綁腳演可疑婦人

【電影LOL.外語930】《寫出友共鳴》認識種族歧視入門課

【電影LOL】今個星期睇咩戲 《飢俄人妻》《鬼船瑪莉號》《地下拳》《暖男花店》《婚禮之後》

【電影LOL】韓片暑假喪屍熱 朴信惠劉亞仁拎自拍棍救自己!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能