雅虎香港新聞 【電影LOL】冇套收得但係長拍長有 「景甜第二」李一桐又有新戲
戲院因為新冠疫情停業，連帶片期大兜亂，內地電影《匆匆那年》、《誰的青春不迷惘》導演姚婷婷新作《我在時間盡頭等你》原定今年2月情人節內地上映，不過因為戲院停業，套戲變咗暑假檔，而香港嘅上映日期亦要重新排過。
電影講述年輕舞蹈員邱倩（李一桐 飾）前往浪漫之都布拉格追尋夢想，一次意外翻看了年邁保安員林格（李鴻其 飾）的日記，內裡竟紀錄著邱倩從小到大的點滴，甚至她另一半也包含其中，熟悉的情節，陌生的戀人，翻開一頁又一頁的文字，卻像一段又一段的回憶……隨著深藏在時間盡頭的愛被一頁頁翻開，邱倩與戀人可否相會在同一時空?
故事其實有啲似《回到最愛的一天》溝西片《每天愛你第一次》(50 First Date)，男主角為咗心儀嘅女性不停穿越時空，而女主角會不停喪失對男主角嘅記憶，所以兩人嘅相戀片段要不停重新寫過。飾演男主角林格嘅李鴻其出道不久就憑《醉．生夢死》攞過金馬獎最佳新演員，不過之後戲路浮沉，近年轉戰內地拍偶像劇《親愛的 熱愛的》幫佢打開知名度，多咗唔少演出機會。
而女主角李一桐一出道就做被《延禧攻略》製作人于正相中，擔正劇集《半妖傾城》女主角，2015年先出道，到而家就已經拍咗14套劇集，套套都擔正做女一，合作對象位位都係內地高人氣、高流量小鮮肉，同鄧倫合作民初劇《海棠經雨胭脂透》、於《劍王朝》同李現合作、又同楊洋拍《特戰榮耀》，最新仲有偶像劇《親愛的，摯愛的》同胡一天合作。
不過產量勁多嘅李一桐最近被封為「景甜第二」，因為除咗《射雕英雄傳》黃蓉一角之外就未有其他代表作，但同另一位謎一樣嘅內地女星景甜一樣，演技一般、拍極唔紅但拍親都係人氣藝人，兼且長拍長有，令人懷疑佢係咪有驚人背景！今次唔拍劇集轉戰電影，夥拍台灣新一代實力派李鴻其，有無機會洗脫「景甜第二」呢個稱號呢？
更多電影文章
【電影LOL】奇洛李維斯越殺越有 《殺神John Wick》系列收得 第4、5集一次過開拍
【電影LOL】疫情影響計唔掂數《星空奇遇記》新戲籌備工作煞停
