【電影LOL】《后翼棄兵》女主角 Anya Taylor-Joy 落街放狗被發掘嘅上位女星

·3 分鐘文章

礙於疫情關係,全世界都多咗人留喺屋企煲劇。早排先睇完Emily in Paris靚人靚景劇情無負擔,睇咗當自己去咗旅行;呢期最hit劇集一定要數Netflix出品《后翼棄兵》(The Queen’s Gambit),由故事哲理、金句對白講埋演員服裝,呢幾日外國劇迷仲瘋狂到出動埋黃色虛線,分柝畫面幾何線條構圖!

《后》講述天才棋手Beth 8歲時失去雙親,被送進孤兒院後結識咗熱愛西洋棋嘅工友,因此展開棋手之路。Beth人生起起跌跌,年幼失去雙親、酗酒濫藥,因為下棋名成利依然孤獨,仍然擺脫不了失去家人嘅心理創傷。劇集以The Queen’s Gambit命名,除咗呢個係專業捉棋用語,亦喻意其人生有捨棄,同一時間從失去中獲得新機遇。

24歲嘅Anya Taylor-Joy將呢位天才棋手嘅一生演得相當精彩!年紀輕輕無經過專業戲劇訓練,學過芭蕾舞嘅佢偶然一次落街放狗就俾名模Kate Moss嘅經理人相中,先成為模特兒,後來轉為演員,出道短短5年片約不斷,仲套套都好有noise!

佢細個時因為對大眼被同學笑同排擠,不過同學眼中嘅怪樣反而有利成為演員,Anya外貌非常有辨識度!佢嘅銀幕處女作,恐怖片《不巫之地》香港觀眾較陌生,但第二部作品《思。裂》(Split)應該有印象,電影除咗睇James McAvoy曬演技1人分飾多角,你應該記得Anya飾演當中唯一生還少女Casey!明明隨時無命驚到喊,同時又要保持冷靜同James扮friend求生,Anya演辮當中嘅慌張非常到肉!

《思》做得咁好,續集《異能仨》當然有份zd1Anya拍驚慄片好成功,不過可塑性高嘅佢做完少女Casey就轉去拍愛情喜劇《EMMA:上流貴族》做古裝媒人婆,電影改編自珍奧斯汀嘅文學經典,戲中Emma自信、霸道、鍾意收仔做兵,又鍾意幫人做雞仔媒人,有別於以往喺恐怖片驚青震騰騰銀幕形象!

拍得愛情片做Emma以為佢行一線大星之路,專攻大路商業片嚟拍,殊不知Anya㨂咗《新異變人》,理應係超級英雄片模式,點知套戲dark到爆!《新》評價好一般,不過個cast吸引,同場仲有《權力遊戲》嘅細妹Maisie Williams同《怪奇物語》嘅陰沉哥哥Charlie Heaton,全部演員性格鮮明好有特色,Anya依然從中脫穎而出,做埋雙手可變利刀嘅動作演員!

可惜《新異變人》同《Emma:上流貴族》今年上映時撞正新冠疫情,導致好多觀眾都錯過咗,好彩2套戲出師不利,年尾都仲有套劇集《后翼棄兵》爆返上嚟,星運要紅起上嚟真係擋唔住!

更多電影文章

【電影LOL】今個星期睇咩戲 《那夜凌晨,我老公死極死唔去》《繼園臺七號》《那裡是天堂》《奪命監》

【電影LOL】《后翼棄兵》女主角 Anya Taylor-Joy 落街放狗被發掘嘅上位女星

【電影LOL】《007:生死有時》黑人女角自爆︰我就係新一代007!

【電影LOL】 《夜香‧鴛鴦‧深水埗》一套戲四段港味濃的土炮故事

【電影LOL】《鬼滅之刃劇場版》逆市奇葩 日本10日破百億票房

【電影LOL】Netflix聖誕檔大片 音樂劇The Prom 搵梅麗史翠普再演惡頂一姐