雅虎香港新聞 【電影LOL．地道鬼節影院】《熱血青年》救人變成害人 恐怖女鬼原來係港姐
今日農曆七月十四日，民間傳說鬼門關大開，傳統會燒街衣路祭，照顧下班孤魂野鬼。可能受「鬼節」影響，港產鬼片出現嘅通常都係厲鬼，唔少仲極驚嚇，好似彭氏兄弟嘅《見鬼》、許鞍華嘅《幽靈人間》同劉鎮偉嘅《猛鬼》系列！
今日同大家介紹2002年舊片《熱血青年》，雖然故事背景唔關鬼節事，不過入面隻惡鬼都幾嚇人，電影更獲得第9屆香港電影評論學會大獎選為推薦電影。導演鄭保瑞憑《熱》獲提名第22屆香港電影金像獎「傑出青年導演」提名。戲入面最搶鏡嘅應該係飾演女鬼嘅梁敏儀，港姐出身嘅佢本來行性感路線，為配合戲中造型剃光頭又搽白塊面，見到都毛管戙！
《熱》故事講述有三名擁有特殊血型的青年，他們分別是阿樂（周英傑飾）、詩敏（周麗淇飾）與阿力（周子駒飾）。他們雖然素未謀面，但卻能感應到對方的存在，這使他們感到極度的不安。原來三人曾經各自獻血，巧合地被用作拯救一對自殺的情侶，結果救咗個男救唔到個女，令情侶陰陽相隔。
不甘獨赴黃泉的女子燕屏（梁敏儀飾），憑著體內特殊血型的感召，逐步接近這三名「多管閒事」的熱血青年，逐一實施她的「報恩」計劃……
厲鬼雖然得一隻，一樣睇到心寒！燕屏臨終前以怨恨眼神睥住阿樂、詩敏及阿力一幕，令人非常不安，佢死後不停纏繞三人，逼令佢地代為殺死已成為植物人嘅男友。被鬼纏身嘅詩敏不停發惡夢，更被勾起童年時母親謀殺親夫嘅記憶，精神萎靡嘅佢差啲被送去精神病院！
另外兩個男嘅亦無好日子過，阿力搵神父幫手驅鬼，結果連累埋神父；阿樂想救詩敏卻不能自救，詩敏為救阿樂居然……唔講太多嘞，自己今晚睇。
電影恐怖在於3位青年出於善心救人，結果好人無好報！近年鮮有港產鬼片，一來因為合拍片成風，而內地唔講得鬼神，就算明明講鬼都要講成精神病；二來觀眾深明生人比鬼更可怕，道德淪亡、無知自私嘅破壞力比厲鬼更驚嚇，更防不勝防。睇新聞心寒過睇鬼片！
更多電影文章
【電影LOL】《黑豹》Chadwick Boseman英年早逝 不顧星途發展 專演平權電影為黑人發聲
【電影LOL】今個星期睇咩戲 《屍殺半島》《嚇。房》《鳴鳥不飛》《吞上癮》《爆怒時速》
