【電影LOL】天之驕子變過街老鼠 竟然有人想拍《孫楊傳》?

·3 分鐘文章

傳記片長拍長有,大家對名人光鮮背後不為人知嘅一面非常好奇。就算電影不同於真實,仍然有一定吸引力!以往傳奇片多以偉人、對世界有貢獻或者皇室貴族,近年多咗啲富爭議性人物嘅傳記片。

有買家於正在舉行中嘅康城影展市場中發現,有中國內地公司打算開拍一系列傳奇片,其中包括內地游泳選手、依家先29歲嘅孫楊!對於佢有咩事蹟值得被拍成電影,筆者表示摸不著頭腦,根據網媒「中國電影報導」,《孫楊傳》將會講述佢近幾年事業風波,亦會回溯佢童年、少年以及受訓點滴。

孫楊於2012年倫敦奧運中奪金,亦破過世界紀錄,分別於200、400、800、1500公尺賽事攞過金牌,成績確實驕人。可惜因為2018年抗拒藥檢事件,今年被國際體育仲裁法庭判禁賽8年,由天之驕子跌落凡間,本應夠哂戲劇性,不過睇埋佢平時嘅行為,個人品性不敢恭維。

孫楊無品怪事都幾多下,近期有國際體育仲裁法庭聽證會,無視規矩中途自己換人做翻譯;又試過無牌駕駛、喺仁川亞運會發表「日本國歌好難聽」言論,比賽又唔跟大隊著贊助服裝;贏咗比賽仲要同英國選手Duncan Scott講「You’re loser, I’m winner」,以專業運動員嚟講佢都幾無體育精神!

孫楊無品行為外,仲有多次禁藥風波,但因為有國家同佢阿媽力撐,所以做人打橫行。可惜花無百日紅,藥檢過程細節曝光,加上裁判結果,官方發言即時變低調,連一向盲撐嘅小粉紅都唔再撐,仲笑佢係「巨嬰」!

《孫楊傳》開拍消息一出,惹嚟網軍批評,貼文出唔夠一日就已經頂唔住要刪post。不過刪帖唔等如唔拍,內地影業一向奧妙,只要攞到電影局批文,阿爺要救人,巨嬰分分鐘變返神!

計我話與其拍孫楊,不如拍全天候跟到實貼身照顧嘅《孫楊媽傳》。話哂自小悉心栽培,無論發生咩事都堅持囝囝無錯,全副心機養出個有事業無EQ嘅孫楊,將套戲當成育兒教材應該仲有睇頭!

更多電影文章

【電影LOL】今個星期睇咩戲《死因無可疑》《我老細係天后》《福島50死士》《劇場版 角落小夥伴》

【電影LOL.外語930】抽水亂入玩膠始祖 真.喜劇之王《搞笑驚魂》

【電影LOL】康城影展有入圍冇獎頒 香港7大導作品《七人樂隊》入選

【電影LOL】荷里活又拍戴安娜生平事蹟 Kristen Stewart孭飛面癱演技被質疑

【電影LOL】樣衰笑匠Will Ferrell 新戲扮冰島band友搞邊科?