【電影LOL】好啱呢期睇!新片Bad Education踢爆作育英才嘅斯文敗類

·3 分鐘文章

香港風波不斷,一波未平一波又起,連考個試都出問題!今年DSE歷史科題目涉及日本侵華,引發政治風波,教育局要求考評局取消題目。

教育志在啟發思考,培養美德品性,不過辦教育嘅人唔一定有如此特質,做教師辦教育同打扮工無分別,只為名利而非真正作育英才!《狼人》Hugh Jackman及《冰之驕女》奧斯卡最佳女配角Allison Janney新片Bad Education,就同大家示範咗教育家都一樣可以貪得無厭!

改編自真人真事,故事講述美國Roslyn校區代表Frank Tassone(Huge Jackman飾)聯同一眾教職員包括Pam Gluckin等人(Allison Janney飾)於短短10年內帶領其所屬高中成為全國排名第4嘅公立學校,仲刷新大學入學率,成個社區因為出咗名校而水漲船高,連帶房價颷升,地產交投暢旺!

Frank表面對教育充滿熱誠,家長對成功將學校排名提升嘅佢讚不絕口,對外聲稱早年喪妻所以維持單身而成為區內搶手貨,經常有女士投懷送抱。實際上Frank係同性戀,男友仲係佢任教學校嘅舊生!Frank同Pam對學校排名充滿熱誠之外,對錢及奢華生活一樣咁熱衷,講白啲係校內大部份教職員都係蛇鼠一窩,多年來從教育局騙取高達數百萬元美金,用嚟買車買樓!

由於為人師表嗰面表現卓越,掩蓋咗佢地生活質素與收入不相稱嘅問題,直至校內學生為咗寫篇歌頌Frank及Pam對學校做咗幾大貢獻嘅擦鞋鱔稿,先意外發現學校帳目混亂,繼而揭發出史上最大型嘅校園騙局!最令人不齒嘅係被判有罪嘅各個教職員仍然出緊為數唔細嘅退休金!呃咗納稅人咁多錢仲繼續可以出長糧,所以話天下烏鴉一樣黑!

Bad Education係HBO出品,電影一出大受好評,劇情緊湊無悶場,唔少影評仲覺得今次係Hugh Jackman從影以來表現最好嘅一次!雖然戲內戲外呢位Frank Tassone好人有限,但全靠開明、刺激思考嘅教育制度,先令學生報小記者Rachel(Gerladine Viswanathan飾)從與Frank訪談中察覺異樣,從而踢爆呢宗世紀騙案!

更多電影文章

【電影LOL】戰鬥民族癲喪暴力黑色喜劇 《睇你幾時死!》惡警私了古惑仔

【電影LOL】內地買亦舒《流金歲月》拍劇 演曼玉同紅姑嘅會係……

【電影LOL】勁juicy奇案紀錄片Tiger King大熱 搞到殺人懸案重新開file

【電影LOL.外語930】Irrfan Khan《少年Pi》以外的作品《美味情書》午餐愛的故事

【電影LOL】今個星期睇咩戲 《女神撞正基OL》《我們永不言棄》《EMMA:上流貴族》《野種》