【電影LOL】《幻愛》 談一場疑幻似真嘅愛情

·3 分鐘文章

等了又等,終於等到本地電影《幻愛》上映!為咗符合香港金像獎入圍資格,《幻愛》早於上年年底做過幾場優先場,因此耳聞大量好評。雖然最後失落金像獎,只獲得最佳原創電影音樂一項大獎,仍然無損電影嘅吸引力,特別近年觀眾睇厭咗警匪片,更鍾情於有香港味嘅小品片。

幻愛》係導演周冠威繼《十年-自焚者》相隔5年後新作,導演作品貴精唔貴多,套套有心!《十年》成為近期香港寫照,心寒得嚟同時可見周導對香港政治、未來等嘅敏感度;處女作《一個複雜的故事》同9位演藝學生共同創作,話係學生作品不過水準甚高,成為少數可於戲院上映嘅學生project。

學院派出身嘅周冠威今次於《幻愛》同樣展現紮實嘅功力,睇得出為電影題材做咗好多資料搜集。電影講述善良戇直嘅小學教師阿樂(劉俊謙 飾)係精神分裂症康復者,雖然渴望愛情但從來不敢戀愛。偶然機遇下,佢喺街頭偶遇清麗脫俗嘅欣欣(蔡思韵 飾),一見鍾情卻掙扎應否透露病情。躊躇之際,不幸再次病發,被幻覺纏繞。阿樂更發現欣欣真正身分,竟然係個攻於心計嘅心理輔導員?二人發展出一段懸疑曲折嘅禁戀,疑幻似真。

電影涉及題材都幾多,男主角阿樂嘅精神病、男女之間嘅愛情,唔刻意但處處流露香港氣息。《幻愛》於屯門拍攝,大銀幕上睇到屯門屋邨好驚喜,一來屯門少有於香港電影中出現,二來就算拍咗,屯門都變咗古惑仔龍爭虎鬥之地,有幾時見過好似《幻愛》咁連輕鐵都拍到似日本電車咁浪漫!

不過最驚喜仲係發現香港有靚有氣質仲有演技嘅後生演員,《幻愛》為劉俊謙電影處男作,舞台劇出身嘅佢面對鏡頭一樣無難度,更憑阿樂一角獲提名香港金像獎最佳新演員。

蔡思韵於電影內一人分飾兩角,佢成功演譯出2個角色性格嘅南轅北徹,連氣質都唔同!好有文青、空靈女神feel嘅蔡思韵暫時香港作品唔多,反而相當活躍於台灣影視,先後演出過《返校》及《極道千金》等。

《幻愛》睇戲以外,仲睇到其實香港電影業幕前幕後都好有材,與其講青黃不接所以來來去去都係嗰幾位演員做主角,不如諗下點解要固步自封成日重複拍同一類型電影,唔試多啲新戲路同新人?觀眾又點解唔肯試新嘢?

希望未來可以見到導演及兩位演員參與更多香港作品!

更多電影文章

【電影LOL】天之驕子變過街老鼠 竟然有人想拍《孫楊傳》?

【電影LOL】今個星期睇咩戲《死因無可疑》《我老細係天后》《福島50死士》《劇場版 角落小夥伴》

【電影LOL.外語930】抽水亂入玩膠始祖 真.喜劇之王《搞笑驚魂》

【電影LOL】康城影展有入圍冇獎頒 香港7大導作品《七人樂隊》入選

【電影LOL】荷里活又拍戴安娜生平事蹟 Kristen Stewart孭飛面癱演技被質疑