【電影LOL】戰鬥民族癲喪暴力黑色喜劇 《睇你幾時死!》惡警私了古惑仔

·2 分鐘文章

電影界受疫情影響,未有耐回復正常。新片大片一早宣布延期睇定啲先,造就唔少小本經營但係眼前一亮嘅世界電影有位曝光。

平時6月都係大片天下﹐今日想介紹嘅係一套俄羅斯電影《睇你幾時死!》。呢個名基本上係由英文片名Why Don’t You just Die?直譯。《睇你幾時死!》2018年已經喺俄羅斯上畫,但係似乎口碑唔錯,得到多國發行商青睞,美國本來都排咗4月上,結果變成喺串流平台上映。

點解叫Why Don’t You just Die? 嗱!俄羅斯人叫得戰鬥民族,就梗係好勇鬥狠架啦。故事講女子Olya叫古惑仔男友Matvei出手殺咗自己老豆Andrei,Matvei帶齊架生上門做嘢,但係當差兼且貪贓枉法嘅Andrei都唔係省油的燈,再加上其他枝節,構成連場打打殺殺……係「連場」,都話戰鬥民族嘛,打極唔死是常識吧!

但係!唔好以為只係一套動作片或者血腥暴力片,片中好多互砌場面都相當卡通化,搞到觀眾一邊驚一邊笑。甚至有影評覺得《睇你幾時死!》有著塔倫天奴、日本名導園子溫甚至《原罪犯》朴贊郁等暴力美學大師嘅影子。的而且確,片中一場12分鐘困獸鬥,好笑得來張力不絕,又真係拍得住《原罪犯》入面嗰場「一個打n個」嘅巷戰。

《睇你幾時死!》係編劇導演Kirill Sokolov首套長片,30出頭就已經拍出個人風格,話唔定已經有美國大片商mark實佢。要睇未來大導最具個人風格之作,呢套值得留意。

click睇預告片

更多電影文章

【電影LOL】內地買亦舒《流金歲月》拍劇 演曼玉同紅姑嘅會係……

【電影LOL】勁juicy奇案紀錄片Tiger King大熱 搞到殺人懸案重新開file

【電影LOL.外語930】Irrfan Khan《少年Pi》以外的作品《美味情書》午餐愛的故事

【電影LOL】今個星期睇咩戲 《女神撞正基OL》《我們永不言棄》《EMMA:上流貴族》《野種》

【電影LOL】戲院難做 傳Amazon想收購AMC院線