雅虎香港新聞 【電影LOL】戲院難做 傳Amazon想收購AMC院線
只係傳言都足以令股價跳升？雖然美國新冠肺炎肆虐，荷里活停哂工，連戲院都停業已久，成個電影業進入寒冬，生意都做唔到，加上近年串流平台崛起，改變咗民眾嘅觀影習慣，戲院前景唔多理想，股價理所當然被睇淡。不過，近日只係傳出Amazon有意收購美國有過千間戲院嘅AMC院線，消息一出，AMC個價即刻升咗56％！
最奇妙係交易涉及2間美國公司，但係單料就由英國《每日郵報》爆出。據報導AMC同Amazon就收購一事都唔回應，又有匿名人士話根本無收購一事！財金界Bloomberg分析就認為戲院受疫情影響，改變消費者觀影模式，就算疫情過去，戲院都無可能回復以往業績，成為擱置收購嘅一大主因。唯一好處就係因為戲院無生意加上本身負債，收購價會好相宜！
其實於2012年，中國萬達集團以26億美元高價收購AMC院線，揚言要喺今年達到全球20％嘅市場佔有率。可惜計劃不如預期，26億蒸發到只剩2億，AMC破產傳聞不斷，萬達王健林自己亦身家大縮水，要止蝕唯有離場，所以先有Amazon有意收購一事傳出。
Amazon因為疫情反而生意大好，人人避免社交接觸令網購需求大增，加上本身有串流內容平台Amazon Prime Video，積極推出自家製電影及劇集，用戶數因為疫情大増！影視內容方面，Amazon最大對手分別係Netflix及Disney+，前者屢屢攻下奧斯卡大獎，內容製作方面非常強橫，為咗符合提名資格，Netflix影片都會選擇性於戲院上畫。
而Disney＋本身坐擁荷里活幾大片廠 － 迪士尼、漫威及二十世紀霍士等，所製作嘅電影本身係金蛋，所有院線爭住上。反而Amazon相對於內容及發行版圖都係最弱嘅，暫時Amazon Studio製作嘅電影《奇幻摩天輪》、《美麗男孩》、《寶貝童年》及《熱氣球飛行家》等口碑不俗，不過比起對手出品名利雙收嘅成績，Amazon仍要多多努力。
所以收購院線對於Amazon增大影視版圖嘅計劃絕對合理，一來自家院線可保證製作有戲院做，增加曝光有利串流平台觀看率，二來又多個條件同其他荷里活片廠傾合作，買版權；三來有院線，可以進佔傳統影業市場，加上自己嘅串流平台，玩盡新舊模式，宣傳發行可以更有靈活性！
可惜無人預計2020年會有全球性疫情，衝撃成個電影業，計劃再好都未必行得通，Amazon到底會唔會收購AMC院線，暫時無人知！
更多電影文章
【電影LOL】今個星期睇咩戲 終於強勢回歸！醫生速遞、女鬼橋、魔髮精靈...
