【電影LOL】拜登上台贈興?總統、第一夫人傳記片輪住拍 Dennis Quaid演列根

·3 分鐘文章

拜登喺美國時間星期二完成宣誓,正式成為最新一屆嘅美國總統。無獨有偶,荷里活同時宣佈推出以「總統」、「第一夫人」為題嘅電影及劇集!外媒Entertainment Weekly獨家報導《決戰中途島》、《再見亦是狗朋友2》男星Dennis Quaid將會演出美國前總統列根嘅傳記片。

第40任美國總統列根喺美國地位祟高,有高大外型、又係演員出身嘅列根曾經兩度被《時代周刊》選為年度人物。在任期間憑住優秀嘅口才同出眾嘅演講技巧,善於將施政方案轉化成易於理解嘅演說,就算偶有失誤都可以靠個人魅力搭救,於民間有極高支持度。列根原本係民主黨人,51歲先轉陣加入共和黨,在任期間民望太高,列根成為以後共和黨總統後選人嘅模版,以其成就為目標。

傳記電影《列根》(Reagan)確定由The Miracle Season導演Sean McNamara執導,故事將根據Paul Kengor著作The Crusader: Ronald Reagan and the Fall of Communism一書改編,另外仲訪問咗超過40位列根嘅朋友有關前總統嘅生活點滴構成。由孩童時代講到成為年輕演員,重頭戲當然係佢作為美國總統嗰幾年執政生涯。

而搵嚟Dennis Quaid飾演總統列根,導演就話因為外型相似,而且Dennis作為前軍人,背景同列根有相似之處,實為不二人選。Dennis Quaid表示對於自己能夠擔演男主角難以置信,佢非常尊敬列根,會盡力演好角色!而第一夫人又係女明星嘅Nancy Reagan則由《星光夢裹人》女星Penelope Ann Miller飾演。

講開第一夫人,Showtime將會推出劇集The First Lady,劇集將會橫跨幾代第一夫人,最新公布嘅演員名單相當強勁,從影多年嘅米雪菲花(Michelle Pfeiffer)首次拍電視劇,飾演第38屆1974年上任嘅第一夫人Betty Ford。身為女權分子嘅佢當年非常敢言,公開就酗酒、毒癮等議題發表意見,提高公眾認知,亦為女性爭取平等待遇,甚至贊成婚前性行為,言論喺當年相當受爭議,不過佢民望仲高過佢嘅總統丈夫!

劇集仲有第32屆、1933年就任嘅第一夫人羅斯福(Eleanor Roosevelt)及好有明星風彩嘅第44屆總統夫人Michelle Obama,羅斯福夫人演員人選未定,但係Michelle Obama就確定由好戲又多產嘅奧斯卡金像獎最佳女配角Viola Davis飾演。由《法網危情 》(How to Get Away with Murder)有住複雜過去嘅律師、《寫出友共鳴》嘅工人姐姐到新作《藍調天后》飾演傳奇歌后,戲路極廣,期待佢同米雪菲花鬥戲!

更多電影文章

【電影LOL】牛年賀歲港產片 《狂舞派3》《不日成婚》《唐伯虎之偷天換日》有冇機會上畫?

【電影LOL】等睇《天竺鼠車車》?不如睇《屁屁偵探》劇場版頂吓癮

【電影LOL】電影評論學會大獎 《理大圍城》膺最佳電影 鞏俐奪最佳女演員

【電影LOL】迪士尼為《花木蘭》報名爭奧斯卡15大獎 劉亦菲甄子丹角逐影后男配角

【電影LOL】Netflix大熱《柏捷頓家族:名門韻事》古裝浪漫床戲多多

【電影LOL】露骨短訊爆鍾意SM Armie Hammer驚傳性愛醜聞 辭演天后J.Lo 新片

按此下載全新應用程式Yahoo APP,並以Yahoo電郵免費登記成為會員,即時可完成簡單任務賺取Ypoints,憑分即可換領不同獎賞! 新人更可即時換領限量新人禮,立即下載!