【電影LOL】《棋魂》內地劇集版曝光 造型錯劇情夾硬毀童年回憶

·3 分鐘文章

不論劇集或電影,由漫畫改編成真人版都好易出事。日本人改返自己嘅日漫通常造型還原度最高,不過都唔係套套捉到原著嘅神髓;日本以外地區嘅改編往往驚嚇收場,好似內地剛剛推出嘅真人版劇集《棋魂》就毀咗唔少人嘅童年回憶!

早於2018年出品公司就宣佈將會改編自日漫《棋靈王》拍成真人版劇集《棋魂》,仲話由神祕一線小生主演,預計2019年推出。當時消息一出,內地網民一遍哀嚎,擔心毀咗原著,了解國情嘅佢地亦睇死劇本會大幅改動以配合審批,結果拖到2020年10月,劇集終於面世,果然不負眾望……咁嚇親人!

首先,說好嘅「一線小生」無影,換嚟後生但無咩知名度嘅演員胡先煦飾演「進藤光」,「藤原佐為」則由張超飾演。無當紅小鮮肉主演唔緊要,都唔好搞衰個造型,飾演棋魂嘅張超出道多年雖未大紅但本身外型唔差,可惜劇組幫佢化行妝,面白眼影濃搞到成隻妖孽咁!

再來,故事改編加入本土原素本來合情理嘅,故事由日本改成於中國發生,「進藤光」改名做「時光」、「佐為」改成「褚贏」,日本平安年代改為中國古代南粱等可以接受,《棋魂》仲好出力改編劇本,務求加入大量內地80、90後集體回億,令故事本地化等觀眾更易代入!

劇中「禇贏」睇《鐵齒銅牙紀曉嵐》、《還珠格格》睇到眼濕濕,會出現周杰倫嘅《葉惠美》,童年時光鍾意玩四驅車呢啲小心思設計其實幾有心,可惜太出力夾硬加入「1997香港回歸」情節,旁白話「歷經了百年滄桑的香港,將回祖國的懷抱,這標誌着香港同胞,從此成為祖國這塊土地上的真正主人」,硬塞時光講「今天是每個中國人都該高興的日子」就畫蛇添足,突兀又對劇情進展無幫助!

香港觀眾睇到呢段反應不良,相信內地朋友都睇到莫名其妙,回歸同捉棋有咩關係?再者,1997年有其他同佢地更貼身嘅大事喎!咁貴買《棋靈王》返嚟拍,又要加咁多枝節,點解唔自己寫個新劇本?

其實內地拍劇有舖毀原著癮,內地原創小說照毀不誤,一堆神仙劇《三生三世十里桃花》、《陳情令》、《擇天記》全部改編自內地受歡迎網路小說,個個劇名唔同但故事由內容、人物設定連造型都改到極相似,認唔返部原著小說!

不過將日漫改編成驚嚇真人版又唔係內地專利,美國真人版《龍珠》、電視劇《死亡筆記》、《流星花園》(Boys Before Friends)暫時仍然佔據最驚嚇改編榜首位置!呢款另類「中美大戰」,真係勢均力敵!

更多電影文章

【電影LOL】今個星期睇咩戲 《怪誕黑巫后》《八佰》《怪奇默友》《仍然要相信》

【電影LOL】錢國偉電影力作 《喜愛夜蒲》一拍3集 用新人收千萬票房

【電影LOL】盛傳賣價6億美元無人吼 美高梅否認《007:生死有時》網上公映

【電影LOL】Cinema City半夜澄清 否認上映撐警片《時代》

【電影LOL】《狂野時速》拍埋第11集收工 想搵呢位男神助陣埋尾

【電影LOL】日本漫畫真人版電影《碧藍之海》 賣點竟然係「保證睇到靚仔露鳥」?!