雅虎香港新聞 【電影LOL】沙拉保夫性醜聞纏身 Netflix極速割蓆新片除名
沙拉保夫演藝事業猶如坐過山車，童星出身嘅佢憑2008年《變型金剛》極速走紅，名利雙收成為全球新生代偶像。不過走紅無耐就是非不斷，經常醉酒鬧事，又被影到唔少怪行，直接影響工作表現，大好形象就咁插水，到《變型金剛4》直頭被飛起，換上中佬麥克華堡做男主角！
《變》後就算形象麻麻都仲斷斷續續有工作，14年夥拍畢彼特主演《戰逆豪情》，又參與拉斯馮特爾執導嘅《性上癮》，15年拍影帝Gary Oldman、Kate Mara合演Man Down，戲內表現出色，連《滾石》雜誌都大讚佢喺《戰》嘅表現非常好！不過有演技都無用，因為作品唔夠佢本人嘅醉酒失控行為搶鏡。
近年終於「的」起心肝戒酒入療養院處理自已酗酒問題，治療期間以自身經歷寫成Honey Boy，講述自己與父親以愛之名實為傷害嘅關係。退伍軍人父親有暴力傾向又有性罪犯案底，無自理能力仲成日對個仔郁手郁腳，一家人生活拮据，直至沙拉保夫開始拍戲賺錢，生活先有改善。父親一角由佢本人親自扮演，電影2019年於Sundance影展首映，大獲好評，被認為沙拉保夫翻身之作！
今年仲有主演Pieces of a Woman，故事講述不幸流產、失去胎兒嘅母親，如何處理傷痛嘅故事，角色沉重。電影為女主角憑《職業特攻隊》、《皇冠》走紅嘅Vanessa Kirby帶嚟威尼斯影后殊榮，出品人Netflix見勢頭咁好，依家就為奧斯卡做準備，專誠整咗俾評審睇嘅廣告網頁，其中包括力sell電影男、女主角沙拉保夫及Vanessa Kirby成為最佳男、女主角候選人。
正當大家以為沙拉保夫事業重返正軌之時，前女友兼有份主演Honey Boy嘅FKA Twigs入稟告佢家暴、精神虐待同刻意傳染性病俾佢，事件曝光引起各界嘩然。接連澳洲天后Sia（首Chandelier唱到街知巷聞𠴱位）自爆被沙拉保夫呃做小三，仲話佢講大話講到接近病態！沙拉保夫雖然否認部份指控，不過都就事件道歉，指當時受酗酒及創傷後遺症困擾，個人不在狀態咁話。
件事仲未上庭開審，不過業界已經紛紛割蓆，連Honey Boy導演Alma Har’el都唔撐佢，又被飛出Olivia Wilde新片，Netflix直頭將佢從Pieces of a Woman除名。本來俾奧斯卡評審睇嘅「For your consideration」網頁，電影主演名單、候選最佳男主角等都無咗沙拉保夫個名！Netflix就話剔走 沙拉保夫係增加入圍奧斯卡候選名單嘅戰略，而唔係因為近日醜聞。無咗男主角個名會大啲機會入圍？呢個邏輯難以服眾喎！
更多電影文章
【電影LOL】《神奇女俠2》票房失利 打鬥場面唔夠刺激 觀眾負評︰以為睇溫情小品
【電影LOL】一線阿姐Emily Blunt ＋金像編劇 拍節日電影Wild Mountain Thyme竟然失手？
【電影LOL】《權力遊戲》拍2套前傳 一套爛到要抽起 另一套不容有失
【電影LOL】Netflix 拍《幽遊白書》真人版 會唔會又崩壞？
