【電影LOL.煲劇分部】原版《東京愛的故事》日劇 黃VIU有得睇

·3 分鐘文章

你人生中第一套睇嘅日劇係邊套?後生嘅會答你《逃避雖可恥但有用》,80後可能會話係《悠長假期》,再數上去又點少得《東京愛的故事》?

呢套播出接近30年嘅經典,7月底將會喺黃色VIU平台上架!

《東京愛的故事》以漫畫家柴門文同名作品改編,故事圍繞90年代東京兩男兩女的愛情糾結。初到東京工作嘅完治(織田裕二飾)暗戀同學里美(有森也實飾),熱情而可愛嘅同事莉香(鈴木保奈美飾)擔當完治嘅軍師。里美知道完治心意,但兩人交往過後若有所失,里美對完治舊同學、風流不羈嘅三上(江口洋介飾)心動,完治又發現和莉香日久生情。

《東京愛的故事》於1991年1月富士電視台的「月九」(逢星期一晚9點檔)播放,當時電視劇仍然係普羅大眾娛樂,《東京愛的故事》第一集就有超過20%收視,到結局更錄得近3成3嘅佳蹟。而且三位主角鈴木保奈美、織田裕二及江口洋介更一劇而紅,仲要係紅足咁多年,到而家都係一線演員。而劇集主題曲、小田和正主唱嘅《突如其來的愛情故事》,更加成為1991年全日本銷量第一嘅單曲細碟。當年香港都有播過配音版,係喺亞視!

事隔多年,富士電視台翻拍《東京愛的故事2020》,唔再係電視台月九劇,而係喺網絡平台上架;角色性格設定大致相同,不過比起原版最大改動,可能係更直截了當嘅床戲,唔少原版觀眾都覺得吃不消……

《東京愛的故事》嘅吸引之處,在於每個角色都唔會一面倒嘅討好/討厭︰莉香對完治完全奉獻,但亦要求對方同樣投入,令完治無所適從。完治睇落敦厚但係猶疑不決,對里美同莉香造成傷害。正因為角色似現實生活中不完美嘅你我他,劇集至會大受歡迎。

撞正呢期又要留家抗疫,可以一次過睇晒新舊版,更重要係……可以睇多眼好掛住嘅東京!

更多電影文章

【電影LOL】戲院冇新戲 上Netflix睇刺激動作片《不死軍團》

【電影LOL】台灣文化局出post明抽廣電局新指引 呢套台片一定犯晒規

【電影LOL.退票安排】戲院再次停業 一文睇晒各大院線退票安排

【電影LOL】網傳內地廣電局又有劇本新指引 歷年來有邊啲規矩得啖笑?

【電影LOL】《屍殺列車》續集《屍殺半島》下周上畫 5個你要知嘅重要訊息