【電影LOL.煲劇抗疫】唐詩詠大讚!韓劇《夫妻的世界》大婆復仇無得輸

·3 分鐘文章

有見大家為咗防疫而盡量留於家中唔外出,部份串流平台好體貼地決定免費開放平台等大家可以在家煲劇。一向買外語劇有一手嘅免費「黃viu台」又有好劇值得追!講緊係緊貼韓國播映、創下韓國JTBC開台以來最高收視紀錄嘅《夫妻的世界》,連唐詩詠都喺IG大讚好睇!

《夫妻的世界》改編自2005年英國劇集Dr Foster,故事講述一對看似恩愛的夫妻,因為背叛導致完美的生活出現裂痕,兩人互相傷害並抓緊對方不放,繼而陷入漩渦的故事。家庭醫學專門醫師池聖雨(金喜愛 飾),是一位事業愛情兩得意的成功女人,她與電影導演李泰吾(朴海俊飾)結婚後,一直支持著丈夫的事業。一天,她發現對方背叛自己而陷入絕望低谷,決定向丈夫復仇!

發現老公有小三繼而復仇嘅故事,灑狗血得嚟仲係韓劇常見戲碼,不過《夫妻的世界》話哂改編自英國劇本再加入韓國本土元素,令套劇節奏相當明快。劇中由金喜愛飾演嘅醫生池聖雨,雖然事業有成,亦唔係要依賴丈夫嘅女人仔,不過堅強果斷嘅性格,面對老公嘅背叛,亦同時令佢意無反顧、寧為玉碎地報仇,都幾可怕下。

不過《夫妻的世界》嘅老公泰吾都係賤男一名,偷食有小三呂多景(韓素希 飾)仲毫無悔意,同老婆對質時仲話「陷入愛情唔係罪呀」,點解唔可以同時愛兩個人呀?講到幾咁天經地義,阿媽出殯當日仲掛住同小三激咀,離婚之後同小三生埋細路都仲好意思寄張全家福邀請信俾前妻,呢啲男人都算世紀賤人。最可怕嘅係明明無錢人品又差,但娶到個醫生賢妻仲可以食埋個有錢又靚女嘅小三,個世界幾咁唔公平!

就係呢個睇到人牙癢癢嘅設定,令呢部大婆復仇劇變得相當有可追性,因為好想知賤男會做咩而前妻又會有咩應對策略,家庭倫理劇都係一場鬥智鬥力嘅攻防戰!

唔講唔知飾演女主角池聖雨嘅金喜愛今年已經53歲,出道39年仲係美魔女嘅佢有樣有演技,就算多次主演婚外出軌題材,依然交出唔同層次嘅演譯!如果睇《夫妻的世界》唔夠喉,推介大家睇埋佢另一套2014年播映嘅婚外情劇集,一樣由JTBC出品、夥拍最年輕青龍影帝劉亞仁主演嘅《密會》,當年為咗宣傳仲幫時裝雜誌拍咗非常火熱嘅造型照,兩個人拍埋一啲都唔似差20歲!

《密會》中佢飾演著名音樂學院總監,意外發掘到天才但家境貧困嘅劉亞仁,由原本師生關係發展成禁忌之戀,金喜愛於《密會》一樣愛得轟烈,為了愛情,不惜身敗名裂!當中都有唔少19禁情節!

更多電影文章

【電影LOL.外語930】影后前傳 那些年Emma Stone少少咸多多趣嘅校園喜劇

【電影LOL.疫情影響】新片全線改期 本地戲院轉陣放映經典名片

【電影LOL】《叔.叔》一窺銀髮同志的世界

【電影LOL.疫情影響】骨牌效應 迪士尼Marvel全線大片改期上映

【電影LOL•外語930】新型肺炎帶走《冧歌有情人》 電影歌曲創作人

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能