【電影LOL】牛年賀歲港產片 《狂舞派3》《不日成婚》《唐伯虎之偷天換日》有冇機會上畫？

下個月就係農曆新年，因為疫情政策令各行各業叫苦連天，特別對於一眾花農嚟講，今年特別難捱，於戶外舉辦嘅花市限制多多，最後會點搞仲係未知之數。除咗行花市，相信唔少觀眾習慣入戲院睇賀歲片，賀歲檔睇港產片定律嚟，差唔多上得呢個期嘅電影都大收旺場，可惜戲院停業多時，仲未知幾時開得返，搞到片期亂哂籠！

原定於2021年賀歲嘅有英皇同古天樂旗下「天下一」合作嘅愛情喜劇《不日成婚》，電影由陳茂賢執導及編劇，由陳家樂、衛詩雅、朱栢康、談善言、岑珈其、楊偲泳及郭奕芯主演，故事圍繞幾對情侶攻防戰，或者準確啲講係逼婚戰，暫時先導預告以男性角度出發，成為被逼婚對象，唔知遲啲會唔會有女性角度版本？ 因為肯定唔係個個女人都會逼婚囉！

陳家樂上年賀歲檔以《我的筍盤男友》參戰，對住黃子華嘅《乜代宗師》變得弱勢，未知今年有無機會贏返次！「旺角活地亞倫」葉念琛今年一樣有賀歲片，難得係古裝扮想唔再係現代愛情故事嘅《唐伯虎之偷天換日》！電影由「細龜」黃一山飾演皇帝，「四大才子」則由孫耀威、吳啟華、李子雄及李國麟飾演，個cast都幾有趣，趣在好電視feel，唔知古代有無「阿寶」？

原定農曆年上演嘅仲有熱血青春嘅《狂舞派3》，原班人馬上陣，由黃修平導演執導，BabyJohn蔡瀚億、顏卓靈、依家成為男團Mirror隊長嘅Lokman楊樂文及劉敬雯（奶茶Lydia）、「劉小華」劉皓嵐等人主演，融合街舞、跑酷、太極，以勁舞爭取合理待遇，對抗地產霸權！上集《狂舞派》睇得大家熱血沸騰，燃起實現夢想嘅動力，期待第3集為香港觀眾帶嚟正能量！

據聞原定仲有套集合多位香港電影人製作嘅《總有愛在隔離》上賀歲檔，不過搞咗咁多措施、限聚令同強制檢測都無助趕走疫情，如果《總》如期上映無必有捧場客，愛在「隔離」喎， 新年流流講埋啲咁嘢，大吉利是咩！

更多電影文章

【電影LOL】等睇《天竺鼠車車》？不如睇《屁屁偵探》劇場版頂吓癮

【電影LOL】電影評論學會大獎 《理大圍城》膺最佳電影 鞏俐奪最佳女演員

【電影LOL】迪士尼為《花木蘭》報名爭奧斯卡15大獎 劉亦菲甄子丹角逐影后男配角

【電影LOL】Netflix大熱《柏捷頓家族：名門韻事》古裝浪漫床戲多多

【電影LOL】露骨短訊爆鍾意SM Armie Hammer驚傳性愛醜聞 辭演天后J.Lo 新片

【電影LOL】Netflix 年度大片巡禮 神奇女俠搭死侍拍動作喜劇有睇頭 眾星雲集Don’t Look Up災難變喜劇

按此下載全新應用程式Yahoo APP，並以Yahoo電郵免費登記成為會員，即時可完成簡單任務賺取Ypoints，憑分即可換領不同獎賞！ 新人更可即時換領限量新人禮，立即下載！