雅虎香港新聞 【電影LOL】玉女無以為繼 Vanessa Hudgens拍聖誕賀節片殺出血路
聖誕將至，又係一年一度攞返《寶貝智多星》、《真的戀愛了》呢幾套應節經典出嚟睇。其實年年都有大量賀聖誕嘅電影，美國直頭有Hallmark（係！出賀卡嗰間呀）頻道，每年12月就推出幾十部聖誕應節電視電影。依家連Netflix都唔執輸，自家製作節日電影，雖然睇落少少老土、成本又唔高，不過應該幾受歡迎，因為有續集！
講緊係《歌舞青春》女主角Vanessa Hudgens，當年應《歌》紅遍兒童及青少年界，Vanessa嘅發展明顯無男主角Zac Efron咁好，劇集完結後以人氣青春玉女形象主演《美女與野獸新世紀激情篇》，可惜票房評價一般。接住再拍《天姬戰》、《地心探險記2：世外秘島》及《狂野青春》等中至大型電影，戲內繼續賣青春無敵，可惜幫唔到Vanessa由童星轉型成女演員，結果人氣漸漸下滑，角色越做越細。
笑容甜美形象正面嘅佢似乎搵到出路，就係轉型做聖誕電視電影女皇！2018年幫Netflix拍《兜亂公主闖情關》，戲內佢一人分飾2角，分別飾演糕點師傅Stacy同小國公主Lady Margaret，2個角色嘅分別在於服裝同口音。故事講述公主受官職壓到透唔到氣，遇上同佢生得一模一樣但自由奔放嘅Stacy，為咗吸下自由空氣，兩人決定互換身份幾日，結果Stacy同王子撻著而公主就同Stacy嘅好朋友Kevin互生情愫！
叫得做聖誕片，成件事當然童話過童話，個個角色都純真好心地，觀察力仲好低添！所以完全察覺唔到身邊人唔同咗，而又好易打開心扉，幾日就足以共墮愛河！老土得嚟又有幾分guilty pleasure，所以今年推出續集《兜亂公主闖情關：反轉再反轉》賀聖誕！
今次Vanassa更上一層樓，一人分飾3角：Lady Margaret、Stacy同貪錢表妹Fiona。今次故事複雜少少，Lady Margret想同Kevin重修舊好，為咗爭取私人時間再次同Stacy交換身份；另一邊廂，貪錢表妹諗住冒充Margaret將佢啲錢轉落自己戶口，點知綁架綁錯咗Stacy！最後一定大團圓結果，Margaret同Kevin有情人終成眷屬，Fiona奸計敗露兼良心發現，而Stacy因為大團圓結局而開心。
睇住Vanessa為咗分飾3角而轉不同口音同髮型服裝，可信性低得嚟仲幾尷尬。如果有第3集，佢可能會1人分飾4角，繼續拍落去可能仲勁過James McAvoy套《思．裂》，一人分飾廿幾角！佢上年仲幫Netflix拍咗套《現代聖誕騎士》，講14世紀嘅騎士穿越去到現代，差啲被Vanassa飾演嘅高中老師車死，小鎮人情味寧舍濃，所以獨居女子Vanassa為咗照顧受驚騎士，二話不說帶咗呢位陌生男子返屋企住，住住下當然快樂地生活下去！
呢種唔駛用腦又超現實（兒童卡通都無咁夢幻）嘅電視電影，真係好適合喺節日、尤其需要正能量嘅當下睇。雖然製作成本有限不過夠入屋，Vanessa Hudgens已經連續3年幫Netflix拍聖誕電影，唔再係人氣偶像嘅佢，轉型做Netflix節日片御用女主角都幾好呀！
更多電影文章
【電影LOL】沙拉保夫性醜聞纏身 Netflix極速割蓆新片除名
【電影LOL】《神奇女俠2》票房失利 打鬥場面唔夠刺激 觀眾負評︰以為睇溫情小品
【電影LOL】一線阿姐Emily Blunt ＋金像編劇 拍節日電影Wild Mountain Thyme竟然失手？
