【電影LOL•留家抗疫】日劇《昨日的美食》拍電影版 未上畫先睇劇學整抗疫住家菜

·3 分鐘文章

因為新型冠狀病毒關係,再加上政府剛剛新下嘅例,要市民保持相當嘅社交距離,食肆每張枱分開至少1.5米、每枱又唔可以多於4個人。加上食飯點都要除口罩,為免受感染,大家都少咗出外用餐,好多本來唔煮飯嘅朋友都變咗做大廚,日日喺社交媒體post自煮嘅作品,由主食、煲湯到甜品應有盡有!

日劇早早發掘咗「飲飲食食」呢個題材,尤其鍾愛一個人的美食,由《深放食堂》、《孤獨的美食家》、《和歌子酒》等一個人享受美食嘅故事,到《俠飯》黑幫大佬教你簡易煮出美食!近日終於唔駛一個人,交由一對戀人煮飯仔、享受平靜美好時光嘅《昨日的美食》。

《昨》由吉永史漫畫作品改編。作者本身好鐘意食,所以故事經常圍繞美食展開,其漫畫作品亦多次被改編成日劇,2001年由仲未係Johnny’s社長嘅瀧澤秀明、椎名桔平、藤木直人、阿部寬主演嘅日劇《西洋骨董洋果子店》(TVB譯做《我要cake一cake》)都係改編自吉永史同名漫畫,劇中有大量勁靚蛋糕、靚仔靚女外仲講咗4位主角及身邊嘅人情故事,故事有食有人性,人人啱睇吸引到韓國改編翻拍成韓版電影!

《昨日的美食》同《西洋骨董洋果子店》有啲唔同,美食面前唔止得個睇字,《昨日的美食》睇完會學得識煮返兩味!故事講述律師筧史朗(西島秀俊飾)與髮型師矢吹賢二(內野聖陽飾)係一對同居戀人,史朗係慳家之人,日日睇實超市有咩特價,嚴控每月買餸錢。可以慳住買仲因為佢好煮得,晚晚都煮出一枱好菜色,平得嚟又唔會虐待自己同賢二個胃!

除咗睇史朗同賢二兩個人相處遇到嘅高低起伏,人到中年為戀人為自己將來打算嘅不安,以及佢地同另一對奇葩戀人朋友小日向(山本耕史飾)及被小日向稱為「美少年Gilbert」嘅井上航(磯村勇斗 飾)嘅社交互動,平淡得嚟都幾到肉!

不過劇集另一睇頭,必數史朗每集展示易學又好食嘅菜色!小編睇完劇試過照辦煮碗,發現極易跟,仲幾好食下,其中最愛菜色包括健康版加入好多蔬菜嘅札幌一番味噌公仔麵、三文魚香菇意粉以及日式煙肉蜆肉菜煲,蜆肉煲已經成為家中飯枱常客!

大受歡迎嘅《昨日的美食》鐵定會原班人馬拍電影版,各位不妨趁戲院停業期間,煲下呢套日劇,學返幾款日式家常小菜,打好個底迎接2021年面世嘅電影版!

更多電影文章

【電影LOL】防疫措施下戲院關門 買咗飛可以點退票?

【電影LOL】今個星期睇咩戲! 《無痛斷捨離》《喋血戰士》《乾杯!清酒女流》

【電影LOL】泰片《無痛斷捨離》 丟得走信物 丟唔丟到段回憶?

寸爆政圈兼食正肺炎話題《逃出立法院》打爆喪屍政客光復議會

法國疫情失控 康城影展改期 參展片難創《上流寄生族》奇蹟?