【電影LOL.疫情影響】骨牌效應 迪士尼Marvel全線大片改期上映

電影LOL

受新型肺炎影響,唔單止香港電影業受影響,戲院劇組全部停工,連荷里活都因為疫情檔期大亂,就算好似迪士尼嘅《花木蘭》喺美國首映都做埋,一樣要抽起改期。大家未必對《花木蘭》特別上心,因為唔係個個觀眾有興趣睇動畫翻拍真人版,不過迪士尼旗下Marvel系列作品改期嘅話,應該比較多人關心!

《復仇者聯盟4:終局之戰》完咗之後,唔少漫威迷期待第4階段新發展。可惜無論係補充《復仇者聯盟4:終局之戰》之前嘅《黑寡婦》、定係由Angelina Jolie擔演嘅全新角色Eternals抑或《上氣》等幾乎全部改期。為咗方便大家,特別整理新片期俾各位影迷參考:

漫威觀眾群夠大,所以電影公司一mark咗片期,幾乎全部片都避開,推遲上映日期往往係食咗自己友個檔期。好似《黑寡婦》新片期本身係上Eternals嘅,而Eternals就排返《上氣》嘅期,總之上映次序無掉亂,唔會打亂故事線嘅舖排,一定繼續喺電影彩蛋埋下伏筆。暫時不受影響嘅只有《黑豹2》及《Marvel隊長》!改期唯一敗筆就係各位fans要再等耐啲先有得睇!

Marvel系列票房、名氣夠大,唔擔心片期問題,其他電影就未必咁好彩啦。就算同樣份屬迪士尼,本來北美上5月29日嘅Artemis Fowl就排唔返個期,直接於Disney+串流平台播映。而被《花木蘭》食咗個期嘅,由Emily Blunt同大隻佬Dwayne Johnson主演嘅Jungle Cruise就仲未有新片期。

至於收歸迪士尼旗下嘅20世紀霍士,部份出品無事,好似大導演史提芬史匹堡執導嘅West Side Story及Ridley Scott執導嘅The Last Duel檔期不變,繼續上12月18日及12月25日聖誕大檔;而Ryan Reynolds主演賤賤地新片Free Guy就由原定暑假檔7月3日推遲到12月11日,個期改完又改嘅《新異變人》就無咁好彩,仲未有新片期!

不過片期只供參考,美國疫情爆發,成為全球確診數字最多嘅國家,北美地區戲院仲未可以回復正常營業,疫情一日未過去都不宜人群聚集,所以幾時有新戲睇,只能抱觀望態度!


更多電影文章

【電影LOL•外語930】新型肺炎帶走《冧歌有情人》 電影歌曲創作人

【電影LOL.巨星抗疫】沙士改編電影《世紀戰疫》 主角拍片教抗疫

【電影LOL•哥哥逝世17年】《霸王別姬》南韓台灣再現銀幕 香港觀眾無緣一睹風采

【電影LOL•留家抗疫】日劇《昨日的美食》拍電影版 未上畫先睇劇學整抗疫住家菜

【電影LOL】防疫措施下戲院關門 買咗飛可以點退票?

【電影LOL】今個星期睇咩戲! 《無痛斷捨離》《喋血戰士》《乾杯!清酒女流》

你可能還想看