【電影LOL】疫情推冧新片檔期 香港國際電影節取消 《阿凡達2》《星球大戰》延期一年《花木蘭》上映無期

·3 分鐘文章

新冠疫情反覆,全球受到影響,其中一個重災區一定要數電影及戲院業。戲院因為聚集人群嘅關係,一係唔俾開,一係開咗都無咩人入場,而電影公司就因為戲院時開時唔開而要不斷更改新片上映日期!

迪士尼嘅《花木蘭》本來首映都做咗,不過因為疫情由原定嘅3月尾上映,一改再改到接《天能Tenet》暑假檔。結果《天能Tenet》不敵疫情影響,片商決定抽起另議片期,無咗華納套《天能Tenet》打頭陣試水溫,迪士尼都唔敢輕舉妄動,今次直頭抽起《花木蘭》,暫未公佈新映期,無限推遲!只可以話戲都有自己嘅戲運,人算不如天算,《花木蘭》已經蝕緊大錢!

迪士尼旗下另一套受影響嘅電影,仲包括大導演占士金馬倫嘅《阿凡達2》及《星戰》系列。《阿凡達2》距離上集10年有多,首集面世破哂全球票房紀錄,香港當年都收咗1.7億成為最高票房電影,個紀錄足足維持到上年先被《復仇者聯盟4》打破!《阿凡達2》製作龐大,一個疫情影響製作進度,結果由原訂2021月12月推遲整整一年至2022年12月!《阿凡達》第3、4、5集全部跟住向後推遲一年上映。至於新一集《星戰》亦要延期一年至2023年上映。

本地方面,香港一年一度舉行嘅國際電影節(HKIFF)本來由原訂3月舉行改至8月中舉行,不過鑑於社區疫情嚴重,最終於上星期宣佈取消!香港國際電影每年選映全球幾百套電影,其中有大量相對冷門及小眾題材、唔係電影節放映就分分鐘無得睇嘅藝術電影,絕對係影迷盛事,無奈今年因為疫情反覆而要取消。

無論荷里活、眾多國際影展及香港國際電影展都因為新冠疫情而取消,加上大量電影改期,數埋今年暫時上過或將近會上嘅新戲寥寥可數,好奇下屆各大電影頒獎典禮會點樣變陣迎戰!

更多電影文章

【電影LOL.地道周末影院】許鞍華《天水圍的日與夜》無劇情嘅劇情片 唔悲哀嘅悲情城市

【電影LOL】美國疫情未減退《Tenet天能》無緣暑假檔

【電影LOL】許鞍華獲威尼斯影展頒發終身成就獎 首位華人女性導演獲嘉許

【電影LOL】破解Netflix內容搜尋缺點 記住呢幾組數字!

【電影LOL.退票安排】戲院再次停業 一文睇晒各大院線退票安排