【電影LOL】美國疫情未減退《Tenet天能》無緣暑假檔

·3 分鐘文章

今次連《潛行凶間》大導基斯杜化路蘭(Christopher Nolan)都救唔到市!話說自年頭新冠疫情全球爆發以來,戲院生意大受影響,連鎖大院線頂唔住裁員,小型院線更加無運行,一向鍾情戲院大銀幕觀影體驗嘅路蘭,就曾經出文叫大家力撐受疫情影響大幅裁員嘅家庭式經營院線、位於密蘇里州嘅B&B影院。

就算部份地區戲院照常營運,但係開門都無生意做!一來觀眾為防染疫而唔入場令人數大幅下降;二來荷里活大片紛紛改期,擇日再上,無人又無新片。咁嘅情況下,路蘭堅持新作《Tenet天能》要如期喺7月中上映,希望借呢套重頭鉅製吸引觀眾入場,同埋喺串流平台Netflix、Disney+等搶返觀眾返嚟!

《Tenet天能》用咗天價成本億億聲咁拍,如果疫情未退卻仲上映,點都影響入場人次,分分鐘蝕大本!就算咁大風險,出品公司華納都照撐,可惜計劃跟唔上變化,美國部份地區疫情失控,電影公司宣布將映期由原定嘅7月17日延至7月31日,之後再推遲到8月12日。不過幾度改期始終上唔到暑假檔,因為電影公司日前宣布將《Tenet天能》抽起,新片期日後再公佈。

對於《Tenet天能》嘅新動向,華納主席Toby Emmerich表示會摒棄慣用嘅全球同步上映發行模式,仲會重新製定宣傳及發行計劃。而根據外媒Variety報導,所謂「新發行計劃」其實係睇餸食飯,邊個地區疫情穩定而戲院又可以正常營業,就可以上映《Tenet天能》,唔再拘泥一定北美地區先上嘅慣例。

與其話係新模式,其實更似回歸舊時代 — 喺數碼拷貝仲未盛行,每年又未有咁多Blockbuster、片尾收埋彩蛋留條伏線嘅年代,大部份電影都唔會全球同步,都係各地搵個最適合嘅片期上映。例如日本因為要設計符合日本美學嘅海報,往往遲美國半年先上映。只係到咗依家,社交媒體無孔不入嘅年代,好難唔全球同步,因為電影一上即時劇透,爆哂橋仲要等多個月先有得睇,邊有咁好耐性?!

基斯杜化路蘭嘅作品向來有意想不到嘅佈局,華納今次睇嚟要發揮創意先可以防止劇透。不過今次改期肯定影響成個業界,本來接住《Tenet天能》8月中映期上嘅《花木蘭》、《無聲絕境2》睇個勢都會改期多。經此一「疫」,相信電影業將會面臨翻天覆地嘅變化。

更多電影文章

【電影LOL】許鞍華獲威尼斯影展頒發終身成就獎 首位華人女性導演獲嘉許

【電影LOL】破解Netflix內容搜尋缺點 記住呢幾組數字!

【電影LOL.煲劇分部】原版《東京愛的故事》日劇 黃VIU有得睇

【電影LOL】戲院冇新戲 上Netflix睇刺激動作片《不死軍團》

【電影LOL.退票安排】戲院再次停業 一文睇晒各大院線退票安排