雅虎香港新聞 【電影LOL】《花木蘭》被抵制 迪士尼補鑊回應︰鳴謝再教育營負責單位係慣常做法
劉亦菲主演嘅《花木蘭》風波不斷，同套戲有關嘅幕前幕後不停被爆負面新聞。劉亦菲戲內飾演代父出征女英雄，戲外支持警暴，結果香港、台灣、泰國網友發起抵制行動；呢波未平，嗰頭又被爆電影於新疆取景，仲鳴謝新疆維吾爾自治區委員會宣傳部、吐魯番公安局，即係新疆「再教育營」等負責單位。
各大外媒紛紛報導迪士尼電影竟然鳴謝新疆集中營，事件跳出娛樂版成為新聞頭條，引起更廣泛嘅抵制行動。一向保持沉默對「警暴」、「＃boycottmulan」零回應嘅迪士尼，終於無奈開口回應，迪士尼財務長Christine McCarthy表示「決定於新疆拍攝為公司帶來好多問題」，又話「電影主要於紐西蘭拍攝，為咗呈現中國特有風景，所以部份場景喺新疆拍攝。有中國政府批準先可以於當地拍攝，鳴謝有關單位係慣常做法」。
迪士尼拒絕作進一步評論，不過個回應似係想擺脫「打壓人權」嘅指控。畢竟美國有2位共和黨議員都批評迪士尼做法，仲建議迪士尼將《花木蘭》收益捐出嚟，幫返新疆地區打撃不公義現象。而迪士尼為咗票房，可以犧性立場，為咗《花木蘭》可以順利喺中國上映，籌備階段已經好俾力聽取中國官方意見，將故事改得更符合中國精神及文化，咁都唔夠！為咗討好，仲可以為1997年拍過嘅舊片《達賴的一生》向中國致歉！
外國公司雄心壯志想分中國市場一杯羹，結果慘淡收場，迪士尼都唔例外。《花木蘭》配合晒官方要求，可惜惹上「人權風波」，結果得唔到中國政府大力撐，《路透社》亦爆出「國家互聯網信息辦公室」通知媒體停止報導《花》相關新聞。官方唔撐，內地觀眾未睇就劣評，迪士尼應該好頭痕！
近年迪士尼將動畫翻拍真人版，《小飛象》、《獅子王》、《阿拉丁》套套叫好叫座，唯獨《花木蘭》負面聲音不斷，1998年動畫版因為「太過洋化」落得中國票房慘烈。今次極用心製作中式劇本，剔走木須龍又無哂歌舞連場，得罪動畫版影迷同時又不得內地民心，《花》故事教訓大家千祈唔好為咗錢而失去自我，因為只會人財兩失。
其實都幾諷刺，動畫版《花木蘭》故事，同唱到Christina Aguilera大紅嘅主題曲Reflection，都係講真我幾咁重要，偏偏迪士尼自己唔記得咗。
更多電影文章
【電影LOL】今個星期睇咩戲 《天能》《顫．役．前》《由菱開始》
【電影LOL】《花木蘭》又出事 片尾名單感謝再教育營負責單位 外國網友狠批迪士尼虛偽
【電影LOL】許鞍華《第一爐香》預告片曝光 被批選角出事 彭于晏唔似瘦弱公子
