【電影LOL】荷里活大片改期 奇洛李維斯一年四套戲美夢幻滅

·3 分鐘文章

戲院受新冠疫情影響被停業接近一個月,上星期五終於開返,各大院線紛紛推出票價優惠,最平可以廿幾蚊入場,簡直係時光倒流價!不過,劈價都暫時未能救返生意同入場意慾,一來觀眾擔心受感染,二來上映新片有限,主要吸金荷里活大片缺席,再加上依家行商場隨時被票控。幾路夾攻,可謂防不勝防,所以戲飛再平都未必有人流!

疫情同限聚令都唔係普遍市民可以掌控嘅因素,唯一可以決定嘅只係片單吸唔吸引、有無興趣睇呢套戲,可惜美國疫情比香港更嚴重,電影及戲院業暫未有復工計劃,連帶全球無戲上!各個荷里活片廠都將旗下作品重新排期,之前同大家報告過迪士尼及漫威影業(Marvel)最新片單,今日同大家睇下另一片廠Lionsgate嘅最新上映檔期!

其中大家最關注嘅一定係奇洛里維斯主演嘅《殺神John Wick4》。2021年本來係奇哥年,因為好幾部作品包括幫SpongeBob電影配音嘅The SpongeBob Movie: Sponge on the Rub、事隔多年終於拍續集嘅喜劇Bill & Ted Face the Music、《廿二世紀殺人網絡4》以及《殺神John Wick4》都會於下年上映。不過依家片期大執位,《殺神John Wick4》一推就推遲咗成年,去到2022年先上,而《廿二世紀殺人網絡4》仲未開拍,幾時先上到成謎!

而由Samuel L. Jackson、Chris Rock主演,被評為R限制級,講明極度血腥暴力嘅《恐懼鬥室》外傳Spiral,就算拍好哂都一樣要改期,同樣一推就遲足成年先上,新片期去咗21年5月21日!慘遭同一命運嘅仲有由「死侍」Ryan Reynolds同Samuel L. Jackson主演嘅動作喜劇《保鑣救殺手》續集,由今年暑假變成下年暑假先上。

雖然好多電影都推遲上映,不過今年都仲有戲睇嘅。由男神Benedict Cumberbatch主演,以冷戰時期為背景嘅The Courier(前名:Ironbark)就會喺今個暑假上映,電影今年1月已經喺辛丹斯電影節亮相,故事改編自真人真事,Benedict飾演冷戰期間潛服於蘇聯嘅英國間諜Greville Wynne,為國家收集情報及招募情報人員。男神似乎對真人真事劇本情有獨鍾,今次做間諜相信一樣咁有睇頭。

而其他不受疫情影響,映期照舊嘅仲有「蜘蛛仔」Tom Holland主演嘅Sci-fi電影Chaos Walking,會於2021年1月上映,故事講佢身處嘅星球受不明病毒侵襲,令星球上嘅居民失心瘋。為咗拯救至愛,佢出發尋求解藥!另一套片期不變,21年3月上嘅仲有由近年轉攻拍Cult片嘅Nicolas Cage主演嘅喜劇The Unbearable Weight of Massive Talent!

荷里活大片睇勢會於暑期強勢回歸,呢幾個月可以睇住港產片《叔.叔》、《金都》、《幻愛》先喎!

更多電影文章

【電影LOL】今個星期睇咩戲 終於強勢回歸!醫生速遞、女鬼橋、魔髮精靈...

【電影LOL.第39屆香港電影金像獎】《少年的你》奪8獎成大贏家 太保周冬雨成影帝影后

【電影LOL】抗疫措施解禁 戲院重開 一文睇晒睇戲優惠

【電影LOL.香港電影金像獎前瞻】影帝影后男女配角會係……

【電影LOL.香港電影金像獎前瞻】最簡約頒獎禮 估估大獎花落誰家