【電影LOL】荷里活最環保嘅迪士尼又一翻拍之作 今次輪到史迪仔套《扮嘢小魔星》

·2 分鐘文章

相信成個荷里活最環保嘅片廠一定係迪士尼,係循環再造方面無人能及!繼《獅子王》、《小飛象》、《阿拉丁》、《小魚仙》、《花木蘭》等等之後,最新循環再拍嘅有史迪仔!

講緊嘅環保係迪士尼有幾不遺餘力翻用自己嘅經典動畫、電影故事,將庫存劇目重拍一次,動畫就將佢真人化,本身係真人版嘅就重拍一次!傳聞迪士尼翻拍2002年動畫《扮嘢小魔星》真人版己久,依家終於落實計劃。據外媒Variety報導,迪士尼已經同《我的超豪男友》導演朱浩偉(Jon Chu)傾得八八九九,將會由佢執導新版史迪仔。

當年《扮》海報一出都幾轟動,皆因史迪仔大耳大口加尖牙嘅外貌顛覆咗合家歡動畫固有嘅可愛、得意形象,仲有少少怪!故事講述小女孩Lilo收養咗一隻外表趣怪嘅寵物,並為佢改名做史迪仔,其實史迪仔真身係外星生物,誤打誤撞結果被Lilo當成狗仔收養!Lilo同史迪仔好快建立起深厚友誼,就算之後面對大圍捕遇險,Lilo都堅持同史迪仔共患難,因為家人係唔會放棄彼此嘅!

正因為佢同Lilo真摰友誼太感動,睇完戲後無人再覺得史迪仔怪樣,觀感大變成為人見人愛角色,依家仲係迪士尼樂園其中一隻受歡迎嘅角色添,周邊商品出極都咁好賣!

朱浩偉嘅《我的超豪男友》上映時喺美國引起好大迴響,除咗廿幾年嚟首次全亞裔荷里活商業大片,當中嘅奢華排場、麻雀變鳳凰嘅故事都睇得人好興奮,美國人其實都好鍾意睇有錢仔戀上窮家女故事!不過,最精彩一定要數女主角Rachael同未來奶奶打麻雀鬆章一幕,TVB得嚟又好講到亞洲家庭文化精髓,《我》咁高難度都搞得掂,相信翻拍《扮嘢小魔星》一定勝任有餘!

不過觀眾最關心一定係史迪仔真人化後會變成咩樣,最怕童年回憶崩壞呀!

更多電影文章

【電影LOL】今個星期睇咩戲 《鬼滅之刃劇場版》《屠.姐上錯身》《親愛的房客》《靚太軍樂團》

【電影LOL】梅麗史翠普12月又有新戲 Let Them All Talk冇劇本盡見演員功力

【電影LOL】《鬼滅之刃劇場版》香港開畫收過300萬 鍊贏大片《天能》做年度開畫冠軍

【電影LOL】「戰狼」吳京出征荷里活 同Chris Pratt演保鏢邊打邊搞笑

【電影LOL】《后翼棄兵》女主角 Anya Taylor-Joy 落街放狗被發掘嘅上位女星