【電影LOL】選美題材影視精選 呢套Netflix劇爆過Emily in Paris居然要腰斬?

·4 分鐘文章

今個星期新上映嘅《逆權選美》,電影以真人真事改遍,講述當年轟動一時嘅選美實果活動,以輕鬆喜劇手法道出女權及種族平等議題,睇得開心又言之有物!

選美活動存在幾十年,就算近年影響力減弱,全球仍然有眾多大大小小選美活動進行。雖然大家對佳麗要求唔同咗,唔再局限於外表、身材同千篇一律正面形象,個性頭腦都相當重要,不過一堆女人聚埋競爭,有時幕後花都幾juicy,當真人show咁睇都幾富娛樂性,以下為大家介紹幾套以選美為背景嘅輕喜劇,周未可以煲煲佢:

《選美俏臥底》(Miss Congeniality)

2000年由Sandra Bullock主演嘅喜劇,玩盡選美佳麗刻板印象-假笑、問答環節千篇一律嘅答案,明明係比賽要突出自已,偏偏個個倒模無個性!片中Sandra飾演聯邦探員Grace,同女人味無關係,為捉殺人犯,參加美國花車小姐選美做卧底,扮佳麗仲辛苦過追賊。越扮越入型入格嘅佢於決賽當晚又要比賽又要捉犯,最終能否阻止兇手?又贏唔贏到選美比賽的后冠?

Sandra Bullock全程以認真表情做盡一切滑稽事,意外地好有喜感,由男人婆變選美皇后,訓練過程笑料百出,其中一幕選美問答環節,問及有咩願望,個個佳麗都答「世界和平」(World Peace),笑盡選美刻版印象。

《陽光小小姐》(Little Miss Sunshine)

賀夫一家六口都是怪人,成日家嘈屋閉。老竇(Greg Kinnear飾)力推助人成功課程失敗,阿媽(Toni Collette飾)出盡奶力支持一家大細,包括抑鬱失戀大舅父(Steve Carell飾)、人仔細細但想做選美冠軍的細女Olive(Abigail Breslin飾)、立誓保持緘默的文青大仔(Paul Dano 飾),還有爛口爛到老人院都唔收的爺爺(Alan Arkin飾)。

當阿女獲通知入選加州「陽光小姐」選拔大賽後,一家人駕著甩皮甩骨的黃色麵包車上路,穿州過省去一圓她的小小選美夢。漫漫車路發生大大小小狀況包括最支持Olive選美夢嘅爺爺夢中離世,一家人反而學懂了甚麼方是人生中最珍貴的東西。

選美情節差唔多去到片尾先出場亦係戲中高潮,Olive「驚世駭俗」嘅表演並未為佢贏得后冠,不過家人義無反顧嘅支持先係最重要!飾演Olive嘅Abigail由當年嘅肚圓圓BB樣變成《喪屍樂園: 連環屍殺》嘅美少女。

Netflix劇集Insatiable

故事講述高中女生Patty(Debby Ryan飾)因為外型受盡欺凌與忽視,終日從食物中得慰藉。因為一次意外下顎受傷食足幾個月流質食物,瘦身後變成美女,得到一向夢寐以求嘅萬人迷生活,向欺負過佢嘅人報仇!

劇中嘅佢無因為變咗美女而自信返哂嚟,遇上另一內心脆弱嘅律師兼選美教練,一心以為選美奪冠可以改寫命運,結果越在意個look內心就變得越失控!

套劇未播就爭議聲不斷,美國仲有10萬聯署要求劇集停播,因為有物化女性同鼓吹肥胖可恥等不良訊息喎,Netflix出哂聲明解畫都平息唔到,結果套劇出咗2季就被腰斬!

Insatiable有無物化女性,麻煩觀眾自行判斷,不過套劇癲就一定!劇情充滿大量黑色笑料,少女們參加選美勁多勾心鬥角就梗有,女主角Patty因為太在意別人眼光而漸漸黑化,成為連環殺手!而一眾家長亦無個正常,自己都顧唔掂,又婚外情又3P又偷錢運毒,感情關係七國咁亂,掉返轉頭要啲仔女救。

即使被腰斬又勁多負評,但係我覺得呢套好睇過近期大熱Emily in Paris 囉!多謝~~