【電影LOL】錢國偉電影力作 《喜愛夜蒲》一拍3集 用新人收千萬票房

·3 分鐘文章

2020年真係好難捱!今年有唔少備受喜愛嘅演藝人員離我們而去,尋日有金牌監制錢國偉因病離世。你未必熟悉錢導本人,不過一定聽過或者睇過佢監制嘅綜藝節目,長壽嘅《超級無敵獎門人》、《美女廚房》、《味分高下》、《志雲飯局》等笑聲不斷嘅節目陪伴唔少香港人成長!

除咗綜藝節目,佢亦為眾多歌手如古巨基、鄭伊健、Big Four、GEM鄧紫棋等監制過多場一票難求演唱會。陳志雲形容圈內人緣極好嘅錢國偉「周身刀張張利」,的而且確,綜藝節目、演唱會做得好,涉足劇集、電影亦毫不遜色,夥拍周星馳為其電影《美人魚》擔入執行導演,票房口碑雙贏。

錢國偉執導嘅劇集、電影,好體現到佢圈內人緣有幾好,套套都有大量明星如古巨基、鄭伊健、蘇永康、謝天華、楊千嬅、方力申等客串。不過電影作品為數不多,但係類型鮮明,皆以後生仔女愛情生活為題;電視劇「四葉草」系列因為以家庭為目標觀眾,所以充滿健康青春氣息。去到電影方面,深明觀眾口味,尺度就大好多,最成功一定要數《喜愛夜蒲》系列!

戲如片名以中環蘭桂坊為背景,講述夜場青年男女們嘅愛恨交纏。首集於2011年面世,由當年新人連詩雅、陳柏宇、王宗堯,以及仲係以日日搶話題鬥曝光嘅「口靚模」何佩瑜及陳靜演出。雖然常言夜場無真愛,不過《喜愛夜蒲》就講明男女唔止一夜情,電影主線講述連詩雅同沈志明由一夜情認識,繼而相戀但因誤會而分開,兜兜轉轉嘅故事。連詩雅仲憑《喜》獲得香港電影金像獎最佳新演員提名。

去到第2集繼續有連詩雅主演,不過角色由Jennifer變成Summer,其他「夜蒲男」就有關楚耀、沈震軒、陳偉成、何浩文。女仔方面就加入陳靜儀及松岡李那,今集繼續去蒲,感情線多咗幾條,床戲亦比上集多咗!故事進展成夜蒲得多有啲厭,開始諗出嚟玩為咩。

2014年推出《喜愛夜蒲3》堪稱系列最養眼嘅一步,今集除咗何佩瑜、陳柏宇外,加入許亦妮、雨橋、林德信等人,由中環蒲到廣州仲蒲埋去首爾,今集肉搏床戲更大膽,無論男女演員都毫不吝嗇大曬身材,加埋一大堆後生臨時演員,成個畫面都係青春肉體,不過場面多數係點到即止無變成3級片!可惜今集比前2集劇情鬆散,變成唔知為咩偷情、暗戀、明搶嘅戲碼。

《喜愛夜蒲》系列以香港夜蒲生活為題材,雖然影評分數認真麻麻,仲有人形容為「爛片」、「賣弄軟色情」,不過難得套套起用新人做主角,收近千萬票房其實成績相當不俗。慘得過依家以新人掛帥嘅商業片越嚟越少!

更多電影文章

【電影LOL】盛傳賣價6億美元無人吼 美高梅否認《007:生死有時》網上公映

【電影LOL】今個星期睇咩戲 《老豆死開一陣先》《決戰非常外公》《奪命守門人》《玩命直播》《劇場版 紫羅蘭永恆花園》

【電影LOL】Cinema City半夜澄清 否認上映撐警片《時代》

【電影LOL】《狂野時速》拍埋第11集收工 想搵呢位男神助陣埋尾

【電影LOL】日本漫畫真人版電影《碧藍之海》 賣點竟然係「保證睇到靚仔露鳥」?!

【電影LOL】抗爭運動做背景 《時代》預告片出爐睇到有黑人問號