【電影LOL】韓劇最強綠葉擔正喜劇片《誠實選舉媽》寸爆無恥政客

·3 分鐘文章

名未必人人叫得出,睇樣就一定覺得熟口熟面,講緊係韓國最強綠葉-羅美蘭!佢入行多年,密密耕耘,有追韓劇嘅朋友一定有睇過佢嘅演出,由《請回答》系列到電影《陀槍師奶X新紮師姐》,經常飾演阿媽、大媽等配角嘅佢,次次交出好演技,成為搶眼嘅存在。今次於電影《誠實選舉媽》中擔正做女主角,狂放演繹包你笑得出!

《炸雞特攻隊》之後,韓國爆笑喜劇越拍越有,通常笑中有淚又帶啲意思,仲好有80年代港產片feel。今次《誠實選舉媽》都唔例外,唔止插播《當年情》致敬,情節根本同80年代港產片同出一轍!故事講述羅美蘭飾演嘅政客朱尚淑一向以語言偽術呃選票,講到自己好完美,同丈夫恩愛,又以過世嫲嫲之名成立大學,仲講到自己如何清廉,同老公阿仔住喺700呎舊屋,吹水唔抹嘴咁俾佢做咗幾屆國會議員!

其實朱尚淑無句真,靠背後有勢力人士幫佢隱瞞事實︰美其名嘅老公係軟飯王、個仔唔係親生嘅,阿嫲未死仲健在,不過被逼改名等孫女可以繼續講大話。正所謂善有善報、惡有惡報,朱尚淑正要準備競選連任時,一場意外令佢開親口都變真心話,喪失講大話能力,不停自爆、做訪問又狂講咸gag,形象大變嚇死選民!

好彩呢個時候識得搵個好公關,幫佢包裝成「最誠實候選人」,務求谷底反彈!大爆特爆嘅朱尚淑當然好好笑,不過我對由金武烈飾演專執朱尚淑手尾嘅助手更有共鳴!主子成日亂講嘢,事後要補鑊,又要度新聞稿嘅一定係班細嘅,真係小薯之苦又有誰知!

《誠實選舉媽》爆笑之餘都帶出咗小小議題,政治背後有好多醜惡面,權力亦易令人腐化,唔少人從政可能為咗伸張正義,不平則鳴;一旦進入機制後就被同化,甚至好似朱尚淑咁忘記初衷。佢都仲有個好嫲嫲當頭棒喝,令佢重拾初心,更多人直接於制度中腐化永不翻身!

不過幾好睇都只係電影,睇《誠實選舉媽》一邊笑,諗起現實環境,又難免唏嘘。

更多電影文章

【電影LOL】下年奧斯卡改規則轉形式 務求有獎頒

【電影LOL】青春愛情片《律政俏佳人》18年後再拍新一集 仲可以點玩?

【電影LOL】冇新片好在仲有經典《蝙蝠俠》三部曲、《十二夜》再現大銀幕

【電影LOL】今個星期睇咩戲 《孤城淚》《冰血殺機》《火口的二人》《又要威,又要除頭盔2》

【電影LOL】好啱呢期睇!新片Bad Education踢爆作育英才嘅斯文敗類