【電影LOL】香港電影《叔.叔》一窺銀髮同志的世界

·3 分鐘文章

新型肺炎打亂好多事情,結婚嘅擺唔到酒,電影院居然要閂門,大大小小活動要改期。尋日介紹過迪士尼一堆大片齊齊改期,今日介紹嘅香港電影《叔.叔》,都係因為疫情而延期到5月中上畫。

過去幾年春天,好幾套香港電影都係想藉住香港電影金像獎提名甚至得獎嘅聲勢,排喺4月頒獎禮前後上映。去年嘅《淪落人》就係成功例子,以3百幾萬成本憑口碑同獎項加持,結果票房直逼2千萬。呢個方法可以話係幫到唔少小眾口味又或者新晉導演嘅作品。

《叔.叔》由去年金馬獎獲提名已經先聲奪人,加上香港電影評論學會最佳電影同最佳男主角,接住再喺香港電影金像獎仲有9項提名,本來對套戲宣傳好有利,奈何連大片都因為疫情讓路,甚至戲院都要停業,咁……無計啦。

《叔.叔》係關於兩個老年「衣櫃裡的男人」嘅愛情故事。 70 歲的士司機-- (太保 飾) 與65歲已經退休嘅單親爸爸-- (袁富華 飾) ,大半生受盡傳統社會嘅規範與約束,估唔到喺人生最後一段路,仲能夠遇上對方。 遲來嘅相遇,翻起兩個人塵封心底嘅愛慾。愛情誘惑同社會道德價值拉鋸,內心原始慾望與社會傳統「幸福家庭」之間,佢地必須作出取捨。到底邊一種生活先係人生依歸?

《叔.叔》班底有唔少「低調高手」,憑「打令哥」一角為人認識嘅資深舞台演員袁富華,要同另一位經驗豐富嘅太保,演繹出動人而不著相嘅銀髮同志,的確好考功夫。飾演太保太太嘅歐嘉雯,本身亦有多年舞台經驗,今次係佢首次拍電影。

導演楊曜凱拍過多套國際得獎作品,主題以同志世界為主,《叔.叔》除咗勾勒出老年人出櫃嘅掙扎,亦會帶出老年同志嘅生活處境,並且以2位主角嘅家庭狀況,詰問何謂「家」嘅概念。

而家等到5月先有得睇,希望可以吸引埋一班餓戲已久嘅觀眾入場啦。

更多電影文章

【電影LOL.疫情影響】骨牌效應 迪士尼Marvel全線大片改期上映

【電影LOL•外語930】新型肺炎帶走《冧歌有情人》 電影歌曲創作人

【電影LOL.巨星抗疫】沙士改編電影《世紀戰疫》 主角拍片教抗疫

【電影LOL•哥哥逝世17年】《霸王別姬》南韓台灣再現銀幕 香港觀眾無緣一睹風采

【電影LOL•留家抗疫】日劇《昨日的美食》拍電影版 未上畫先睇劇學整抗疫住家菜

【電影LOL】防疫措施下戲院關門 買咗飛可以點退票?

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能