電影LOL︳《天能》大導Christopher Nolan轉會 群星拱照拍原子彈之父爆炸性秘聞

·2 分鐘文章

《潛行凶間》(Inception)、《天能TENET》大導Christopher Nolan 宣佈告別舊東家,改編自普立茲獎小說American Prometheus: The Triumph and Tragedy of J. Robert Oppenheimer嘅新作Oppenheimer,唔再係由合作多年嘅華納投資,改為同環球影業合作,預計新片成本1億美元。戲中主要人物「原子彈之父」將由多次合作嘅《潛行凶間》、《鄧寇克大行動》及《蝙蝠俠》英國男星Cillian Murphy擔任。

電影講述J. Robert Oppenheimer呢位科學家二戰期間研發原子彈嘅過程,當中牽涉更多人事,外媒The Hollywood Reporter率先報導其他主演陣容,Oppenheimer妻子Katherine將由《無聲絕境》女星Emily Blunt飾演;而於《小婦人》、《黑寡婦》中好搶鏡嘅Florence Pugh將會飾演其紅顏知己兼共產黨員Jean Tatlock。

早前亦落實「鋼鐵奇俠」Robert Downey Jr及《最後絕鬥》Matt Damon會加入Oppenheimer。前者飾演美國原子能委員會主席Lewis Strauss,質疑Oppenheimer對美國嘅忠誠度,並發起聽証會吊銷其國家安全證,令當時被懷疑為蘇聯間諜嘅Oppenheimer備受壓力!

而Matt Damon則飾演「曼克頓計劃」(The Manhattan Project)主腦Leslie Groves中將,帶領研究小組研發美國首個原子彈。最新消息指憑《波希米亞狂想曲:搖滾傳說》成為金像影帝嘅Rami Malek亦會加入飾演科學家,暫時未知佢角色詳情,不過現時落實嘅演員陣容相當豪華,全部都係有票房保証嘅好戲之人!

高額製作、星光熠熠嘅Oppenheimer唔係無隱憂,事緣持續2年仲未消退嘅疫情改變咗觀影習慣,劇情片吸金力大跌,好似近期上映由Will Smith主演網球名將威廉斯姊妹花父親嘅《王者世家》,又或者Matt Damon主演、Ridley Scott執導嘅《最後絕鬥》等大片喺戲院票房麻麻,連Nolan自己嘅《天能》埋單仲賺得少過劣評滿滿嘅《花木蘭》!

觀眾多數入場睇「超級英雄」類嘅event movie,不過Nolan作品實在套套有新橋,由《潛行凶間》到近作《天能》次次成為熱爆話題,作品燒腦難消化但同時吸金,全行得佢先做到。相信環球為咗留住Nolan,絕對唔介意大灑金錢!Oppenheimer暫定2023年7月21日上映。

更多電影文章

電影LOL︳今期睇咩戲 美國女孩/赤BIG靈靈狗/一秒鐘 / 青春弒戀 / 驅魔高校 /Drive My Car

電影LOL︳爆肌舞男再現 《光豬舞壯士》拍第3集準備收山?

電影LOL︳賽車題材吸金勁 片商掟錢搶畢彼特新片搏做下套《狂野時速》

電影LOL︳極索邦女郎Ana De Armas踢走黑寡婦 新片拍美國隊長談情冒險

電影LOL︳又係改編!尼古拉伯爵助手故事照殺 《尚氣》Awkwafina拍尼古拉斯基治

電影LOL︳樊少皇演內地版Ironman《虛擬特攻》 中咗槍仲可以隻揪

電影LOL︳BL大熱!《如果30歲還是處男,似乎就能成為魔法師》拍電影版

電影LOL︳宮崎駿再次復出 新作《你想活出什麼的人生?》3年內有得睇

按此下載 全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能