電影LOL︳《變形金剛：狂獸崛起》內地搞戶外IMAX首映 玩埋AR機械人陪你散步

2007年由導演Michael Bay 打造嘅《變形金剛》真人電影，成功掀起熱潮，仲將2位當時寂寂無名嘅新人Shia LaBeouf、Megan Fox變成巨星。不過系列同2位星途一樣大起大落，後續作品普遍劣評，得電腦特效同動作場面，故事超簿弱！

片廠點都唔肯放過呢隻曾經金蛋，即使評價再一般Michael Bay依然執導咗5部《變形金剛》。2018年終於有少少新意，搵嚟做開動畫嘅Travis Knight執導系列外傳《大黃蜂》（Bumblebee)挽回好評。

《變形金剛》系列嚟到第6集，今集《變形金剛：狂獸崛起》Michael Bay唔再執導改做監製，導演筒交俾《王者之後：重拳復仇》導演Stevn Caple Jr.。距離上集《變形金剛：終極戰士》足足6年，導演、主演都換咗新血，可惜系列似乎無咩新意，最新一輪美國影評似乎唔受落，Los Angeles Times評價電影「沉悶、掉得」（dull and disposable）、「狂獸要人道毁滅」（a beast that needs to be put down)！

雖然評價麻麻，不過系列一向有捧場客，電腦特效夠吸引加上創意宣傳都一樣可以吸客！《變形金剛：狂獸崛起》日前喺距離北京大約2小時車程嘅阿那亞金山嶺搞戶外首映禮，加入AR技術，現場朋友只要戴XREAL AR眼鏡，就可以見到一眾「變形金剛」甚至陪你散步！

根據大會資料，佢哋要喺周圍布滿林蔭嘅金山嶺搭IMAX巨幕過程困難重重，最後用咗5000枝鋼管起咗個可以抗8級風嘅銀幕架，又要計風避雨，就為咗可以坐喺大自然睇《變形金剛》，首映禮係亞洲首個戶外IMAX放映，噱頭十足！

《變形金剛：狂獸崛起》故事重返90年代，有全新派系「密斯武」現身，與博派在地球並肩作戰。電影將於本周四上映，到時睇吓係咪真係咁無新意！

更多電影文章

電影LOL 今期睇咩戲︳蜘蛛俠：飛躍蜘蛛宇宙／犯罪都市：鐵拳掃毒／凶門惡煞／配樂大師：ENNIO

電影LOL︳迪士尼為節流怒炒Pixar元老 救返《反斗奇兵2》被刪檔案嘅功臣都冇得留低

電影LOL︳荷里活導演公會同片廠達成協議 編劇企硬繼續工業行動 嚟緊連演員都罷工？

電影LOL︳《馴龍記》系列翻拍真人版 女主角人選再惹《小魚仙》式選角爭議

電影LOL︳《小魚仙》內地票房麻麻 竟然被指係因為「種族歧視」

按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！