電影LOL︳Tom Holland電玩改編新片Uncharted 電影公司為綁蜘蛛仔勁改角色設定

·2 分鐘文章

《蜘蛛俠:不戰無歸》首日開畫高收867萬,創下今年最高香港單日開畫票房紀錄!雖然戲院IMAX、全景聲、4DX及普通2D等全部場次密密開,依然好位難求,睇遲1、2日又要花心機避開哂啲劇透post,簡直考耐性同耐力!

「蜘蛛仔」Tom Holland片酬由首集25萬美金嘅新人價,幾級跳變成3-400萬美金,仲同女主角Zendaya假戲真做拍埋拖,人氣爆棚嘅佢事業愛情兩得意,《蜘蛛俠》絕對係Sony Pictures嘅金蛋。電影公司亦落重注於Tom Holland身上,特別為佢改動角色,打造Tom成為另一重頭掘金系列男主角。

Sony旗下Playstation電玩遊戲Uncharted極受歡迎,全球大賣4100萬套,呢個尋寶game早早落實改編成電影《秘境探險》,不過籌備足10年拍極都拍唔成,幕前幕後多次傳出易角,傳聞包括由《大黃蜂》導演Travis Knight執導。最終Sony決定將導演筒交俾《喪屍樂園》、《毒魔》導演Ruben Fleisher負責。

同男主角Nathan Drake亦師亦友嘅Victor Scllivan由《變型金剛》男星麥克華堡飾演,當初選角消息一出惹來game迷一片哀嚎,因為遊戲中嘅Victor係一個有二撇雞嘅阿伯,而Mark點都唔似阿伯,角色造型連鬚都無!至於身手一流嘅尋寶獵人男主角Nathan Drake就由Tom Holland飾演。

遊戲版本嘅Nathan中佬一個,據聞因為本身都鍾意打機嘅Tom Holland有興趣接拍,Sony特別為佢將男主角變後生,估計因為要就返Nathan所以連Victor都後生埋,變成依家嘅中佬麥克華堡。電影講述Nathan同Victor拍檔尋找價值50億美金寶藏兼搵Nathan失踪嘅哥哥Sam,途中對上由西班牙影帝Antonio Banderas飾演嘅反派,上演生死爭奪戰!

「蜘蛛仔」Tom Holland宣傳時話《秘》係電玩Uncharted嘅前傳,電影可以令更多人了解Nathan。Uncharted改足10年變成前傳電影,會唔會係Sony睇中Tom腳頭好,簽完佢做蜘蛛俠再用另一個系列綁多佢10年?

觀眾密密將會見住Tom Holland,因為《秘境探險》暫定於明年2月上映。

更多電影文章

電影LOL︳今期睇咩戲 蜘蛛俠:不戰無歸/東京教父

電影LOL︳楊紫瓊拍完《我的超豪男友》人氣神奇反彈 分身打入元宇宙拯救世界

電影LOL︳金球獎提名公布 《魷魚遊戲》入圍爭大獎 仲有咩花生話題?

電影LOL︳成功將負評化成3億票房《超音鼠大電影》開續集掟錢搵巨星座陣

電影LOL︳《天能》大導Christopher Nolan轉會 群星拱照拍原子彈之父爆炸性秘聞

電影LOL︳爆肌舞男再現 《光豬舞壯士》拍第3集準備收山?

電影LOL︳賽車題材吸金勁 片商掟錢搶畢彼特新片搏做下套《狂野時速》

按此下載 全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能