雅虎香港新聞 【電影LOL】Marvel首套華人英雄主角電影《上氣》澳洲外景復工 楊紫瓊疑似有份？
漫威（Marvel）電影《上氣》因為有劇組工作人員確診新冠肺炎，加上取景地點澳洲疫情嚴重，自今年3月起停止拍攝工作。《上氣》原定於2021年2月上映，不過拍攝進度嚴重受阻，兼且成個荷里活片期全部延後，怕且無咁快可以睇到首個華人漫威超級英雄。
不過終於有好消息，根據澳洲電視7News報導，停工多月嘅《上氣》終於喺悉尼復工，仲影到劇組起咗個中式村莊場景出嚟。就片段所見，條村莊相當簡陋，睇個款除咗位處深山就講唔出佢喺咩年代嘅建築，不過有哂綠布景，後製點整都得。
《上》作為首部以華人擔正做超級英雄嘅漫威電影，又係漫威電影世界新登場角色，一舉一動極受fans注目。漫威亦相當大膽起用無咩知名度嘅加拿大演員劉思慕做主角，其他卡士除咗確定有以《別告訴她》贏得金球影后嘅女星Awkwafina，仲有我地熟悉嘅梁朝偉飾演滿大人外，最新傳聞楊紫瓊會加入成為《上》一員。
官方仲未確認演員名單，但睇返楊紫瓊嘅ig，睇佢啲post，有澳洲觀光照又有入境檢測片段，佢似乎喺澳洲。《上》2位主角劉思慕同Awkwafina都有喺post下留言，似乎傳言好大機會係真！如果屬實，《上》會係楊紫瓊第2部漫威電影，佢之前已經係《銀河守護隊2》中客串過！
近年楊紫瓊喺荷里活非常活躍，拍完《我的超豪男友》、《舊年聖誕好戀嚟》又有拍劇集新版《星空奇遇記》，雖然未知佢喺《上》做咩角色，但應該唔會搵以武打角色走紅嘅佢，又做野蠻奶奶角色啩？
更多電影文章
【電影LOL】最強經典片庫 新串流平台Peacock 免費有得睇？
【電影LOL】高層揞一年人工出糧保下屬 荷李活金牌經理人公司撐唔住裁員止血
