【電影LOL】NBA重新開鑼 睇《太空也入樽》點打逆境波

·4 分鐘文章

病毒打亂生活,籃球迷因為街場同室內場被封而冇波打,就連NBA比賽都冇得睇。餓波4個月,今日NBA球季重新啟動!

美國疫情數字依然高企,點解NBA可以開打?錢固然係一大因素,網上有個八卦講法係LeBron James今年好有機會帶領湖人衝擊冠軍寶座,加上4月ESPN播放Michael Jordan職業生涯紀錄片The Last Dance,令Jordan「波神」地位更深入民心,於是「大帝」好希望拎多個冠軍,力保「王位」!呢個講法當然得啖笑,一個球星又點可能影響到一個賽會?不過對大帝而言,一旦奪冠對於本來下年上映、由佢主演嘅電影《太空也入樽2》(Space Jam : A New Legacy)好有幫助。畢竟《太空也入樽》(Space Jam)主演嘅正正係Michael Jordan,當年全球票房成績2億3千萬,相當標青!

《太空也入樽》喺1996年11月上映,同年6月Michael Jordan奪得重返NBA後第一個總冠軍,人氣更勝往時;而且當時NBA球星雲集,睇籃球打籃球風氣大盛,呢套以Michael Jordan crossover 家傳戶曉卡通 Looney Tunes人物嘅電影剛好食正條水。

以當時嘅技術嚟睇,《太空也入樽》呢種真人演出混合動畫嘅電影相當新穎。故事講述自幼熱愛籃球嘅Michael Jordan一圓童年心願,打入NBA殿堂仲成為球星,但係喺事業高峰之際轉行打棒球。始終籃球先係Michael Jordan天賦所在,佢喺棒球界表現麻麻。另一邊廂,外太空星球上嘅遊樂場Moron Mountain生意唔多好,老細派外星人到地球,想擄走賓尼兔、翠兒、達菲鴨等等Looney Tunes卡通人物做遊樂場生招牌。醒目嘅賓尼兔眼見外星人個個細細粒,於是提出以籃球賽一較高下,輸咗就跟外星人走。

呢班外星人都蠢唔晒,佢地喺NBA球場上偷走5位球星嘅球技,令佢地變成波都接唔實嘅平凡人(球員以為係有病毒散播先搞成咁因而拒絕作賽……咦!咁應景呀?)。而賓尼兔就捉咗Michael Jordan幫手,兼任球員同教練,同出茅招嘅外星人開波!

Bill Murray 都有份客串,點解後生嗰陣好肉地啲?
Bill Murray 都有份客串,點解後生嗰陣好肉地啲?

有球星又有卡通人物,簡直係主打家庭嘅最佳娛樂︰爸爸睇球星,囝囡睇卡通,媽媽睇見佢地有節目就放心晒。難怪《太空也入樽》上畫後一年就有計劃拍續集,不過因為Michael Jordan唔肯拍先告吹。本來計劃將「賓尼兔crossover」呢條橋轉為同其他界別合作,有傳考慮過成龍……直到2014年,電影公司宣布正式籌拍續集,並且搵LeBron James做主角,別無他選啦,當時得令又有娛樂性嘅球星,除咗佢仲有邊個?

而家睇返《太空也入樽》條大橋都幾似《少林足球》,雜牌軍遇著屈機對手,憑一己之力加小聰明反敗為勝,估唔到又係一套幾啱時下香港人睇嘅戲。不過,似乎任何打逆境波嘅電影,都啱時下香港人睇……

更多電影文章

【電影LOL】高層揞一年人工出糧保下屬 荷李活金牌經理人公司撐唔住裁員止血

【電影LOL】美國攝製隊封城期間入武漢拍紀錄片 點解冇被官方阻撓? 原因係……

【電影LOL】終於敲定上畫!《天能Tenet》香港8.27上映

【電影LOL】疫情推冧新片檔期 香港國際電影節取消 《阿凡達2》《星球大戰》延期一年《花木蘭》上映無期

【電影LOL】破解Netflix內容搜尋缺點 記住呢幾組數字!