霍汶希直言經理人唔易做 北京工作11年曾從低做起：做場記執垃圾

霍汶希（Mani）現為英皇娛樂集團營運總裁及經理人，風光背後原來並唔容易；霍汶希近日接受《人民日報》「你好，香港」系列微紀錄短片訪問，大談經理人辛酸及北漂11年感受。

霍汶希直言經理人一角唔易做，做得呢行預咗冇收工時間：「經理人生涯就係由藝人起身之前我哋就要起身；藝人瞓咗覺之後我哋都唔可以瞓覺，因為我要安排佢第二日嘅工作。呢個就係經理人嘅節奏。」做事傾向主動爭取機會嘅霍汶希更於2011年選擇到北京工作，藉此擴展版圖：「我好想去一個更加大嘅地方、更加大嘅市場，去睇吓人哋嘅文化，睇吓人哋嘅發展。好希望將香港嘅文化，去同內地咁大嘅市場一齊融合交流，呢個係我好想做嘅嘢，咁就嚟咗北京。」

影片中，霍汶希憶起11年前踏入北京辦公室嘅情景，指張枱乾淨得連塵都冇，僅得一支筆：「我突然間好感慨，你明唔明白呀？又覺得我有冇咁嘅能力可以從一支筆開始慢慢去建立？呢個時候我係有啲迷惘，但係我都仲係好有信心。」霍汶希又決意放下身段：「我唔識製作，所以我去跟組，跟組其實我喺香港，好老實講我已經完全唔可能（去做），但我就同自己講：『你就從低做起。』」當時嘅霍汶希做咗好多喺香港唔需要佢做嘅事，每一日都好似場記咁，就連執垃圾、關心大家飯盒夠唔夠食等等都要做，從中透過唔同工種觀察控制成本，了解到電影製作背後需要好多人力物力產生出嚟。

有「金牌經理人」之稱嘅霍汶希，被指湊大半個娛樂圈嘅藝人，名單包括張家輝、謝霆鋒、容祖兒、Twins、林峰、陳偉霆等人；霍汶希曾大談旗下藝人嘅真實個性，直指謝霆鋒係自己第一個帶嘅藝人，不過當時僅15歲嘅謝霆鋒非常叛逆，不但唔聽話，就連上綜藝節目都素顏，亦時常玩失蹤；而霍汶希就大讚陳偉霆積極上進，主動鍛煉身體，由好瘦好白變成黑壯身形，所以決定幫他出歌。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！