青春不要臉丨丁子朗演活舟仔強顏歡笑 演技大躍進獲網民讚賞

TVB劇集《青春不要臉》正在熱播中，搵嚟余德丞、丁子朗及劉穎鏇等年輕新世代演員主演，劇集以1980年代嘅藝員訓練班作為背景，主要講述一班年輕人為自己嘅理想同目標奮鬥，喺電視台努力打拼嘅故事，唔少觀眾都話睇到回憶返晒嚟呀！劇中演員都有不俗嘅表現，好似噚晚（26日）丁子朗就發揮得非常好，成功演活內心嘅唔甘心、妒忌好朋友同自卑感，獲得網民讚賞。

噚晚（26日）劇情就講到柳德榮（余德丞飾）意外成為《神鵰俠侶》男主角「楊過」，除咗人氣急升之外，仲與偶像妍妹（伍樂怡飾）戲假情真，而好兄弟齊輕舟（丁子朗飾）就繼續做跑龍套。其後佢獲得《神鵰俠侶》強姦小龍女嘅道士尹志平角色，不過當佢聽到女朋友溫楚瑜（戴祖儀飾）自願做女主角嘅「裸背替身」時，竟然出手打賤嘴PA，結果被戲劇組「封殺」。而榮仔就背後幫佢引薦，令舟仔可以加入兒童組做《430穿梭機》主持，發展及收入不俗。舟仔向溫楚瑜求婚，溫楚瑜拒絕並直斥佢放棄演戲夢想。而舟仔直認如果自己係楊過，女朋友就唔會有咁嘅待遇，最後二人仲分手收場。

丁子朗成功演活舟仔強顏歡笑、內心嘅妒忌、不甘同自卑，睇到網民個心嗱住嗱住，紛紛留言大讚佢演技有進步，例如「今晚演繹得好好」、「因為呢套劇真的越來越欣賞你 今晚看見你和祖儀的對手戲 睇到我眼濕濕 我真的能夠感受到舟仔內心的不快樂 你做得很好 我很期待晚晚繼續追看《青春不要臉》愛子朗 愛舟仔」、「今集好好睇！ 見到你強顏歡笑嗰個樣嗰個心路歷程做得好好」、「感情真摯，非常感人嘅一幕」、「好入戲啊呢集 妒忌但係說不出個種感覺表現得好好」、「演技大爆發」、「睇到係由內而外，再外而內既感情」、「做得好好呀！好感人!你進步了好多!加油!支持你!」、「假笑既演繹做得好好！」、「演得好好，上位喇上位喇。」、「今集你同Joey分手個場做得好好，加油」及「演技大躍進」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！