青春不要臉丨伍樂怡與湯鎮業做對手戲零破綻 網民大讚製作有誠意：點解tvb都可以咁高質

勵志熱血青春喜劇《青春不要臉》由余德丞、丁子朗及劉穎鏇等年輕新世代演員主演，劇集以1980年代嘅藝員訓練班作為背景，主要講述一班年輕人為自己嘅理想同目標奮鬥，喺電視台努力打拼嘅故事。劇集喺噚晚（17日）首播，劇情主要講述性格截然不同嘅柳德榮及齊輕舟童年時喺木屋區長大，佢哋一個要減肥一個要增高，仲話唔成功就唔見面。之後，佢哋各散東西，青年嘅柳德榮（余德丞飾）依然係一個肥仔，兼慘被肥妹嫌棄而大受打擊，相反矮仔齊輕舟（丁子朗飾）就努力做運動增高成功。其後柳德榮食泥導致生蟲，喺三個月內消瘦。佢哋仲喺報考藝員訓練班時相遇，目標明確嘅齊輕舟就係想做演員，而柳德榮就只係想見到偶像姜之妍（伍樂怡飾）。最後，德榮家中嘅經濟出現困難，而佢亦確定跟隨齊輕舟追夢。而家就同大家睇下網民對《青春不要臉》首集有咩意見啦！

製作有誠意及充滿回憶
劇集有加插唔少昔日電視場面，將當年小生花旦嘅經典再一次呈現觀眾眼前，例如《雙星報喜》等等。另外劇中仲有唔少80年代場景及道具，令到唔少觀眾都話有誠意、好驚喜及回憶返晒嚟，例如「點解tvb 都可以咁高質」、「正呀！ 可以睇得番 d 明星初出道時珍貴片段」、「呢套劇無論佈景同道具都好有七八十年代懷舊嘅感覺 幕後人員應記一功 值得一睇同推薦」、「有好多童年回憶」、「我記得玻璃牛河呢條片」、「今次唔係求其布景板，D細緻位幾足」、「第一集童年回憶返晒嚟無論屋邨或麵檔個景都好真」、「《青春不要臉》好睇！有誠意係幾好睇，好有回憶！無論插畫/道具/特效都睇得出係誠意之作，繼續努力，打番場爭氣波」、「呢套戲係 sell 情懷，80年代長大有共鳴」及「好懷舊，適合6x,7x,8x年出世的人睇。」等等。劇集得到唔少讚賞嘅同時，網民希望劇集唔係虎頭蛇尾。

CG特技幾可亂真
劇集有使用唔少CG特技，例如將劇中角色融入當年嘅影片、及脹爆余德丞look等等，噚晚就有伍樂怡取代陳玉蓮與湯鎮業喺《天龍八部》做對手戲及余德丞嘅肥仔身形其實係屬於CG特技，嚟緊仲會「還原」《香港小姐競選》、《神鵰俠侶》及《他來自江湖》等經典片段。唔少網民都認為CG好逼真，紛紛留言大讚「將一個瘦仔做到肥仔的特效好勁！」、「伍樂怡扮陳玉蓮又激似喎」、「呢下 Key 得幾好喎」、「肥得好真」、「電視製作嚟講算好好，肥得幾真」、「係,幾可亂真,仲以為係同一套片出」、「伍樂怡同湯鎮業真係好似一齊拍戲咁 特效做得好好」、「好勁, 啲顏色完全 match, 真係睇唔出破綻咁. 個造型又跟返陳玉蓮」及「伍樂怡喺電視機仔入面嗰個古裝好靚喎，段片又整得好真。」等等。

玩蟲好不安
柳德榮因食泥導致生蟲，喺三個月內消瘦，為咗唔想肥返，佢竟然諗住將蛔蟲放入屁股，期間會仲露出側面屁股，不過好彩家人及時阻止。雖然有網民認為呢一幕好好笑，不過就有網民認為劇集過火，留言表達不滿話「食緊飯玩屎玩寄生蟲」、「痴線 擺返條蟲入去」、「食緊飯做啲咁嘅嘢」、「投訴啦 教壞細佬」、「最無敵係諗到用牙擦，喺屎堆中夾條蟲出來！救命呀！」及「開頭有驚喜 但到如廁捉蟲 就有點過了 沒必要 玩過頭 就毀了」等等。

伍樂怡好靚
「仙氣女神」伍樂怡（Kelly）喺劇中飾演電視台花旦「妍妹」姜之妍，係柳德榮嘅偶像，之後佢哋仲會有感情線。唔少網民睇完佢噚晚嘅演出之後，紛紛留言大讚佢好靚，例如「真係超靚女」、「Kelly女好靚」、「扮演小龍女都幾適合呀真係‼」及「做得好好好 好正 靚女 Kelly」、「研妹正呀！」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！