預告二人世界旅行 陳豪反鎖房門 全天候獻「媺」

視帝陳豪日前為太太陳茵媺拍索爆泳裝短片，他笑言不介意在網上分享太太的美好身段，預告稍後與太太展開甜蜜之旅，被記者取笑全天候留在房間溫馨，他即不停爆笑，並假裝做出反鎖房門動作，非常佻皮！

陳豪、龔嘉欣、江嘉敏、鄺潔楹與糖妹等昨日宣傳無綫劇《新四十二章》，適逢元宵佳節，一眾演員向現場觀眾派湯圓應節，場面熱鬧。剛與太太陳茵媺及子女快閃泰國布吉旅遊的陳豪，透露趁小朋友開學前舉家出埠享天倫樂，稍後將撇下仔女，再與太太離港過二人世界。談到他於布吉為太太拍下索爆泳裝片，結果陳茵媺的巨胸成為網民熱話，不少人讚他非常幸福，他笑言：「我係好鍾意攝影，太太就鍾意影相，我哋拍開戲識得鏡頭運用，覺得出嚟效果唔錯，平時去旅行大家會分工。（介意同網民分享太太身材？）冇乜所謂，以前比較保護小朋友，依家想畀大家感受吓，我哋嘅家庭就係充滿歡樂同愛，其實我都拍咗好多片同相，等剪完再慢慢分享畀大家睇。」

龔嘉欣顧及另一半感受

他透露正計劃二人世界行程，問到屆時是否「足不出戶」？他即笑到見牙唔見眼說：「你哋好壞呀！」之後做出反鎖房門的手勢，笑爆全場。談到早前與太太夫妻檔拍劇，陳豪表示：「佢今次拍劇都好辛苦，加上小朋友開學，所以回復番媽媽角色，暫時會專注家庭先。」

至於與日籍生意拍檔松岡哲也傳緋聞的嘉欣穿上露肩開窿連身裙，裙上還有3個吹氣心心，非常吸睛。問到穿「心心裙」是否有要事宣布？她笑住否認：「唔係，報道出街後畀啲短訊炸爆咗個電話，真係嚇死我，希望大家畀啲空間我。（元宵冇約咩？）唔敢約。（努力學日文？）學好啲英文先，未有計劃學日文。（驚戀情見光死？）對方係圈外人，唔想畀咁大壓力人哋，依家報道影響佢，有啲仲唔係事實，唔好意思連累咗佢，總之一日未結婚都唔會公開拍拖，要顧及另一半感受。（同居？）唔係真嘅！」