預訂飛機餐無啦啦變杯麵 航空公司卻拒絕退款

廉航一直以來都係好多人去旅行嘅選擇,原因當然係因為佢哋嘅價錢比較平,不過廉航唔包行李同飛機餐,而且一般來講機位坐得冇咁舒服, 而且服務質素亦十分參差,所以揀之前一定要三思而後行。

最近外國就有網民分享佢同屋企人搭廉航時遇到嘅無理對待。呢個網民Vicki 同佢老公及兩個女一家大細飛去希臘,需時四個鐘頭,喺訂機票嘅時候 ,佢就幫自己同細女訂咗冷盤飛機餐,大女Hannah 同丈夫就訂咗熱盤飛機餐,Hannah 就揀咗馬薩拉雞作為飛機餐,價錢係八英鎊。 但點知係飛行嘅時候,空服人員就同Hannah 講已經冇晒馬薩拉雞,得返泰國青咖喱又或者杯麵,由於Hannah 係唔食泰國青咖喱 , 所以佢就唯有食杯麵,航空公司亦冇因為呢件事提出有退款。

不過奇怪嘅地方係,半個鐘頭之後,佢哋發現機上附近有乘客竟然食緊馬薩拉雞,於是就即刻向空服人員查詢到底係發生咩事,但空服人員就表示其他客人食緊嘅馬薩拉雞質量比較差,同原本預訂嘅並唔係同一樣。更奇怪嘅係,當時有空服人員推出手推車將飛行中嘅食物派發比其他客人,而當中係有其他熱食,但空服人員就冇問過Hannah係咪需要,就淨係比青咖喱佢揀。Vicki 覺得航空公司嘅安排十分之唔合理,因為講緊佢原本用咗八英鎊去預訂一個熱食,而獲得嘅只係價值一英鎊嘅杯麵,又難怪佢咁嬲嘅。

俾咗8英鎊但得到1英鎊嘅食物,佛都有火。

空姐話無,但又有乘客食緊馬薩拉雞。

呢間航空公司嘅安排認真麻麻。

相關文章

青春萬歲! 30歲前必試嘅4種旅遊方法

點解總有人旅行會多艷遇? 5個方法增加機會

富士山登山季開鑼 5大注意事項你要知

【立即讚好】全新 Yahoo 旅遊 Facebook 專頁
Yahoo 旅遊以全新樣貌登場,Facebook 專頁當然同時煥然一新!立即讚好,每日睇盡旅遊新資訊!