領展遲早出讓港人生活圈

.
.

領展近日出手收購英倫商廈,在全球商用物業大減價情況下,不禁令人想到領展再減持本地街坊資產策動換貨「出讓港人生活圈」並不出奇。地區邨民趁領展換貨,又有無方法夾錢接貨?

領展於今年六月建議修訂信託契約,擴大可投資範圍至全部房地產。之後領展管理層曾解畫,表示無意轉型為發展商,相關修訂主要係方便收購包括商場、酒店、商廈於一身的綜合商業項目。從這點睇,領展的增值策略似乎由過去將街坊商場升格轉型為收購具潛力的綜合商業項目,而且多了「環球智慧」,放眼英國。更何況街坊商場一直承擔「民生」責任,加租及變動租戶組合都面對壓力,對領展而言,趁中港、環球商業項目估值大減策動換貨合情合理。

對社區邨民而言,屋企附近領展商場賣盤難以有say,更麻煩係新買家接手後趕走租戶後,有時會任由商場變死場一段長時間,令日常購物大受影響。

.
.

如果由港人出手夾錢接貨又可唔可行?翻查領展財報估值部分,估值排第二的天水圍T Town身價約56億,以周邊兩個屋苑11200戶計,要接手整個商場每戶要夾50萬鬆啲。這筆錢話多唔多,但對居屋業主而言要拎出來都有點吃力。即使戶戶肯夾,由咁多業主籌組的公司管理大大個商場,好多嘢要達成共識都唔容易。

中港合資 China super遍地開花

況且領展自己都講咗,住戶入息中位數持續放緩,可見港人實力有限,商場行業組合最多的是重災區飲事業,夾錢「回購」後回報亦肯定甩頭甩骨。之不過,眼下港人有必殺的「新中港概念」,住戶大可向內地有錢親戚埋手,參考華潤牽頭財團入主Citysuper,用合力用中資「買起」香港為主題,誘親戚熱錢「入關」回購領展商場打造China super,總好過喺大灣區買停車場。以此角度看,彩德邨、油塘邨和天晴邨,深水埗北河街街市、荃灣市中心、大埔墟附近的商場新移民的用家比例較多,理論上最有可能中港合資回購經營。

成個場食唔落,退一步就不如買一忽,再以T Town為例,買其中一萬呎,每戶夾的資本就減至約2.44萬元。有了這一忽,即使商場換莊,業主組成的「合作社」都可以保留一些生活必需品商戶組合。不過在商言商,領展賣產當然寧願成件賣,要成事就可能要靠曾形容領展為「大山」的政府及尊貴議員施加壓力,甚至由按保公司出手提供超低息貸款,為地區邨民帶來收購機會;如果是引內地資金,大可透過微信各大宗親同鄉會埋手籌謀,到時何止Citysuper變China super,U購隨時遍地開花。

===============

精選資訊網站「中環街市」 臉書粉絲頁