顏國樑患聲帶鱗狀細胞癌 月花4萬醫藥費有壓力

TVB 55周年嘅台慶show《萬千星輝賀台慶》搵返唔少舊人撐場。大台其中一套經典處境劇《香港81》嘅演員闊別螢幕多年,演市儈經紀陳積嘅顏國樑離巢十多年後現身。唔少觀眾都聽到顏國樑聲線有變,完show後佢接受訪問解釋,自己患上聲帶鱗狀細胞癌,令佢發唔到低音,目前正接受化療。

顏國樑
顏國樑

最近顏國樑接受TVB《StarTalk》訪問談及病況,佢透露現時正接受化療,每個月醫藥費接近4萬。顏國樑直言有壓力,因為政府提供嘅傷殘津貼只有2千幾蚊,根本微不足道,仲話「我TVB打工㗎咋以前」。顏國樑患癌後冇向人提及病情,亦無搵朋友幫手,直到現身台慶大家先至知。至於身體狀況,顏國樑話做完化療會好虛弱,周身骨痛,行路同講嘢都唔方便。

顏國樑1981年加入TVB,經典作應該係處境劇《香港81》演市儈經紀陳積,當晚顏講返當年陳積一角嘅入屋程度,令好多人都唔知佢姓顏!後來顏國樑演過唔少劇集,包括《真情》、《皆大歡喜》及《十月初五的月光》等,到2008年約滿離開。顏國樑今年初因為聲音沙啞而去睇醫生,到7月去私家醫院檢查證實患癌,後來開始做治療。由於政府唔包部份藥費,顏國樑要拎近40萬出嚟做醫藥費。錢銀以外,顏國樑得病後試過3次因為腫瘤影響呼吸爭啲窒息,好彩冇事。

顏國樑患聲帶鱗狀細胞癌聲線有變 曾酗酒多年排血尿 離巢教太極有原因
顏國樑患聲帶鱗狀細胞癌聲線有變 曾酗酒多年排血尿 離巢教太極有原因

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!