飛虎3壯志英雄｜首集劇情膠又多BUG位 網民：完全唔合情理

無綫劇集《飛虎3壯志英雄》卡士強勁，由苗僑偉、黃宗澤、吳卓羲、蔡思貝及張兆輝等演員出演。劇集喺噚晚（21日）首播，一開始就講有軍火商喺演唱會上交易軍火，之後更有恐怖分子挾持人質，連環槍戰飛車場面逼真。想知網民們睇完有咩感受，快啲轆落去睇下啦！

劇情膠又多BUG位
噚晚劇情就講到軍火商喺演唱會上交易軍火，期間遭到沛國流亡公主Renee（何慈茵飾）策劃暗殺，演唱會淪為槍戰現場，有人被恐怖分子挾持，而飛虎隊員軒（黃宗澤飾）、樂（吳卓羲飾）及小魚（蔡思貝飾）混入人質中。之後佢哋與飛虎裡應外合，成功將人質救出。原來呢啲都係恐怖分子嘅調虎離山之計，令Renee及手提箱可以離開，不過Renee被軒及樂窮追，雙方更展開激烈車戰，最終Renee連人帶車衝下海。唔少網民睇完首集都認為劇情好膠及有好多BUG位，例如演唱會開槍竟然無人知、側頭就可以避子彈、好容易就拆到炸彈，紛紛留言話：「有人開槍聽唔到」、「開左咁多槍先聽到咩」、「側一側頭就避到子彈，幾型」、「套野真係太膠，第一集就咁多bug」、「全能到 炸彈都話剪就剪」、「咁X易拆彈 好X廢」、「拆個炸彈好似拆禮物咁」、「完全唔合情理」、「好膠..頂唔順..」、「第一集多bug 到呢」、「第一次見SDU IC會出面同匪徒談判」、「有恐怖分子，班市民又唔驚 身上有炸彈，唱k又唔驚 恐怖分子咁多槍，一飛子彈都唔用」及「第一集已經咁多膠位」等等。

劇集題材及劇情悶
《飛虎》系列可以話係近年TVB得意之作，所以不停開拍以飛虎為主題嘅劇集，不過唔少網民都認為呢個題材已經拍到有啲悶，再加上首集劇情悶，所以吸引力大減，留言話：「又係呢啲估到哂嘅劇情 好悶」、「飛虎呢個topic真係有啲悶」、「第一集已經咁悶 熄電視棄劇 怪就怪上套太好睇」及「個開場比想像中平淡啲」等等。

吳卓羲＆黃宗澤好有型
黃宗澤（Bosco）、吳卓羲（Ron）分別喺劇中飾演攻擊隊隊長張嘉軒及高子樂，喺第一集就落力演出，已經有槍戰及飛車場面。雖然佢哋年過40，不過依然keep得好好，唔少網民都讚佢哋好有型同唔識老，例如「點解黃宗澤同衝動佬好似唔識老」、「唱k同Bosco都幾型棍」、「吳唱k狀態幾好」、「睇Bosco已經好吸引」及「吳唱K仍然好有型」等等。

飛車場面充滿電影感
首集尾段，恐怖分子Renee被軒及樂窮追，雙方更展開激烈車戰，唔少網民都話好精彩及刺激，紛紛留言大讚，例如「真係好正好有電影級製作」、「電影級製作，正！」、「好睇，尤其車追逐超激」、「那場車追車的真的是厲害」及「電影Feel咁緊張刺激，第一集已令人透不過氣!」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！