食腦喪B|食腦有死者生前記憶疑抄美劇 網民:抄iZombie抄到咁白

·4 分鐘文章
《食腦喪B》
《食腦喪B》

由何廣沛及江嘉敏主演嘅喪屍題材喜劇《食腦喪B》於噚晚(18日)喺翡翠台首播,雖然劇集喺myTV SUPER已經播映完畢,不過依然有唔少定時定候開電視嘅觀眾會收睇,你睇之前《家族榮耀》嘅成績就知啦!劇集名《食腦喪B》有「食腦」聽落好似好恐怖,其實劇集係走搞笑同溫情路線,劇情主要講述廢青「喪B」余陽光(何廣沛飾)喺澳洲工作假期返回香港,但身體出現突然異變。變成不死身嘅喪B,只係想食人腦,喺好朋友法醫古德明(郭子豪飾)及道士華倫(方紹聰飾)嘅幫助下搵腦醫肚,而喪B喺食腦後都會擁有死者生前記憶及特殊技能。想知網民們睇完第一集有咩感受,快啲轆落去睇下啦!

抄外國劇集
噚晚首播劇情講到喪B喺澳洲工作假期返回香港,喺搭巴士期間遇上莫笑春(江嘉敏飾)並與其發生爭執。喪B被家姐「大A姐」余晨曦(朱智賢飾)逼到律師樓見工,期間喪B竟然不由自主地扮豬叫及扮豬爬,並走上笑春架車上面,更再次失控,搞到笑春踢咗佢落車。古德明及華倫見到喪B嘅傷勢可以自動復原,就將佢推到解剖室,最後仲見到佢食腦。唔少網民睇完都話同美劇《izombie》好似,留言話:「抄i zombie抄到咁白」、「點解可以抄izombie抄得咁明顯」、「抄izombie 有死人記憶麻。仲要咁岩有法醫」、「劇情嚟講唔似 但能力 角色 定位 極似 前排先睇完iZombie」、「見到真係o曬嘴,角色設定同技能同美劇《izombie》差唔多。不過人地美劇,故事內容造嘅世界觀就宏大好多,tvb呢套就好似翻版咁…有其形,冇其神」及「其實我覺得佢地有一半抄外國劇,一樣食人腦有死者記憶,但人地是被真喪屍整傷變喪屍,不是毒蜘蛛!」等等。

劇情悶兼欠追看點
劇集首集主要交代人物背景、性格及喪B突然異變要食腦,唔少網民睇完都話悶同欠追看點,留言話:「好膠..」、「套野好唔掂」、「好笑又唔好笑,又沒驚嚇懸疑,冇乜追看點」、「好難睇」、「食腦真係無聊」、「主要係頭半個鐘花太長時間去逐個角色介紹 有d觀眾睇到唔耐煩就會鬧 其實應該要早d講何廣沛變喪屍」及「好悶」等等。

朱智賢/林凱恩 好靚女
劇集搵嚟朱智賢及林凱恩飾演喪B嘅家姐「大A姐」余晨曦及細妹「C妹」余晚霞,佢哋喺第一集已經有唔少戲份,而佢哋嘅演出成功獲得網民關注,紛紛留言大讚佢哋,例如「呢套野女係幾正既」、「朱朱都幾正」、「希望比多d機會朱朱」、「Bonnie呢套幾ok,唔知點解佢拍正劇幾好,但愛回家就愈做愈差咁」、「Bonnie嘅C妹活潑可愛,幾得人鍾意」、「兩個超靚女 加油繼續支持」及「朱朱同iris都very cute and pretty」等等。

何廣沛演出有待改善
男主角何廣沛喺劇中飾演喪B,需要進食屍體腦袋「醫肚」,之後仲會擁有其記憶及技能,不過噚晚佢就錯吃生豬腦,仲不由自主地扮豬叫及扮豬爬,非常落力演出,不過網民們就唔多buy,認為佢表情浮誇及咬字奇怪,例如「何廣可唔可以執返好啲咬字先 好un耳」及「佢講嘢同表情都誇張,睇得好唔舒服」等等。

《食腦喪B》劇照
《食腦喪B》劇照
《食腦喪B》劇照
《食腦喪B》劇照
《食腦喪B》劇照
《食腦喪B》劇照
《食腦喪B》劇照
《食腦喪B》劇照
《食腦喪B》劇照
《食腦喪B》劇照
《食腦喪B》劇照
《食腦喪B》劇照

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能