飯枱合作多過舞台 爆Ian下廚「敬老」 張敬軒：有冇落毒㗎？

出名提攜後輩的張敬軒，與MIRROR成員陳卓賢（Ian）在音樂節目「互唱」，期間大爆在飯枱上合作，原來Ian會為軒仔下廚露兩手，軒仔笑說：「佢有照顧我哋呢啲孤寡老人。」

歌手張敬軒與Ian為黃丹儀主持的音樂節目《Music Panda》任嘉賓，獻唱多首歌曲，還不時Chit Chat，傾得十分開心！Ian笑言與軒仔在飯枱上合作較多，舞台上合作較少，軒仔聞言說「一額汗」。

演唱會終極加場

原來Ian間中會煮兩味，軒仔笑說：「佢好好呀！佢有照顧我哋呢啲孤寡老人，佢有煮嘢畀我食㗎！」Ian傻笑說：「千祈唔好咁講。」軒仔狙擊：「唔知有冇落毒㗎？」Ian即爆笑回應：「暫時未。」軒仔又爆Ian是寫歌「摩打手」：「佢可以一晚就寫一隻兩隻歌。」

軒仔即將舉行的《Revisit演唱會》一票難求，歌迷強烈要求加場，昨日終得償所願，大會宣布終極加開12月30日一場，並將於下周一開售，演唱會總監馮貽柏說：「因為好多人話買唔到飛，幾經努力下，與製作團隊及場地協力爭取，才能加到一場。好想一些買不到飛的朋友可以買到，所以我哋準備開放8成半門票公開發售，希望多啲人買到。」

另外，「叱咤樂壇我最喜愛的歌曲」昨日公布10強名單，軒仔憑大熱歌曲《賽勒斯的愛》入圍，對手包括MIRROR成員姜濤《作品的說話》、Anson Lo《Mr. Stranger》、Edan《Elevator》、Jer《MM7》、Ian《留一天與你喘息》及MIRROR團歌《We All Are》，而Dear Jane的《到底發生過什麼事》及林家謙的《某種老朋友》等亦殺入10強。