飲大咗 英國蒲友起身發現去咗西班牙

19+

 

之前報過一篇網友自爆飲酒後做過嘅瘋狂事,

有人順手牽羊(唔啱架吓),

更多人酒後亂性……

 

英國有對青年人,飲大咗之後瞓著咗,醒返發現……

咦,喺飛機度嘅?

 

都係19歲嘅Tara 同Jack,有晚一齊去蒲,

通常玩到咁上下就會肚餓,就梗係去買嘢食。

於是佢地去到最就近嘅快餐店開餐,位置係喺倫敦附近嘅吉域機場(Gatwick Airport)。

 

點知2條友去到見到飛機,個人high high地之下,

竟然用手機app check吓有冇平機票,

好衰唔衰俾佢地搵到飛西班牙巴塞羅拿嘅來回機票。

然後佢地就頭暈暈咁過安檢、check in、去閘口上機。

 

嗱,呢啲都只係事後補充片段,

因為Jack只係記得買咗機票,Tara更衰,淨係知道自己喺間club個廁所嘔。

 

接下來,下一個畫面,就係佢地兩個酒醒之後,

發現身在客機之上,架機準備降落。

中間發生咩事?唔知!

Tara以為自己死咗,班機嘅目的地係天堂!

 

一場嚟到咪玩吓囉,但係Tara身上係一個仙都冇,冇信用卡,衫都冇多件。

好在Jack有信用卡喺身,佢地又問到旅館嘅朋友借衫著,

先至冇咁樣衰。

唔駛估,去到巴塞,佢地都係去咗蒲,

難得咩都冇喺身都玩得開心,都真係十八廿二先得。

但係之後屋企人已經收起佢地本護照,以免下次又唔知飛咗去邊!

原文傳送門

你可能還想看