首場勁甩轆 AK Edan中招 MIRROR危立天橋猛搖 安全受質疑

天橋隨着12子的動作晃動,成員都不敢行近中間。
天橋隨着12子的動作晃動,成員都不敢行近中間。

人氣男團MIRROR 12場紅館演唱會前晚揭開序幕,惟舞台設計危機四伏,當中Anson Kong(AK)站在高台勁舞時,一度因高台急Chok而失重心;12子登上天橋時,橋身又激烈晃動!

MIRROR前晚施展渾身解數,落力演出約3小時,由於舞台機關眾多,繼總綵排時3位舞蹈員跌落升降台後,演唱會亦有不少驚險場面。曾為舞蹈員幫口譴責的AK,聯同Lokman及Alton唱《虎道門》時,於升降台投入勁舞,期間升降台突然Chok了一下,他即踎低攞平衡,未致跌落台;而他與姜濤沿着舞台四邊的高台行走時,又因地面有高低差而差錯腳。最恐怖是尾聲12子站上「2合1」的天橋獻唱時,橋板隨動作激烈晃動,成員亦未敢行近中間!相關短片在網上流傳後,「鏡迷」大為不滿,要求大會正視安全問題!

雖然舞台設計甩轆,但12子專注演出,表示「演唱會係聽歌嘅」而甚少發言,唯獨Frankie於獨唱前剖白心聲,以「隱形人是如何煉成的」自嘲:「試過隊友好多嘢做,我就匿喺屋企望住四面牆,尤其疫情窮到要問人借錢……大家要同我一樣戒咗個壞習慣,唔好先放棄自己,咁就乜都有可能!我要問大家借信心,可以借啲畀我嗎?」全場以掌聲鼓勵。

Edan棟篤笑執生

至於Edan自彈自唱《E先生連環不幸事件》亦相當應景,咪高峰一直冇聲,鋼琴又未調好音,他即執生解圍:「畀個位我講嘢添!我啱做棟篤笑㗎!邊Part最好睇?一定係呢Part,因為12場淨係得呢場有。」工作人員「急救」後,他終順利演出,再與升上台的Anson Lo化身「黑白雙煞」對彈鋼琴,然後變身劇集《大叔的愛》中的「田牧CP」跳唱。

Encore時,12子重返舞台致謝:「多謝你哋陪我哋一齊完成首場,你哋幫手開咗個靚頭,可唔可以幫我哋大合唱,嚟埋個靚尾?」期間Edan「突襲」姜濤獻吻,嚇得他呆若木雞,演出最終於凌晨前完結,多位成員被Fans感動落淚。

升降台急Chok,險仆的AK落地時驚魂未定。
升降台急Chok,險仆的AK落地時驚魂未定。
Edan突然偷吻姜濤,嚇到他傻笑。
Edan突然偷吻姜濤,嚇到他傻笑。
「田牧CP」Edan與Anson Lo合力跳唱,全場High爆!
「田牧CP」Edan與Anson Lo合力跳唱,全場High爆!



我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能