香港寬頻fb送iPhone遊戲 疑似益自己人？

唔少facebook專頁會玩遊戲送獎品，Sell新產品之餘又可以吸引人流，等專頁之後嘅post能見度提高。   搞還搞，小心搞出公關災難。   香港寬頻早排就搞咗個facebook遊戲，係宣傳即將推出嘅新iPhone。玩法係答一條問題，再另外創作一段不超過50字嘅「想要新旗艦電話」原因，post喺呢個遊戲post入面，仲要喺留言tag朋友。答中問題而原因夠創意嘅，就可以得到新iPhone一部。其實成件事本身都幾唔起眼。   但係呢個fb專頁尋日公布得獎者名單之後，就惹來民憤。因為有網民搵到部份得獎者嘅fb個人資料，聲稱係香港寬頻員工。亦有其他得獎者，撰寫想要新機嘅原因多於50字，於是令唔少網民懷疑，獎品係咪益返自己人。

更眼利嘅網民睇到，部份得獎「幸運兒」，疑似於事後修改想要新機嘅原因到少於50字，有「毀屍滅跡」之嫌。計落，10個得獎人當中，7個犯規，難怪「媽」聲四起，甚至有網民指「出貓」此舉已觸犯法例，如未能於今日中午12時前作交代則有進一步利動云云。

香港寬頻就喺出post後3小時有以下回應︰「對於這次得獎名單公佈上的錯漏，我們深感抱歉。希望大家比時間我哋，重新檢查參加者嘅作品並審查得獎者名單，如發現香港寬頻員工或不符合參賽資格作品，一律會取消資格。   我哋會星期五（21/9）重新公佈得獎名單，希望大家俾多次機會我哋做得更好。造成今次混亂，我哋想再次向大家道歉」   究竟係同事見到個post參加，定係內部扯貓尾互送jetso？呢單嘢有排頭痕，煩過國泰架飛機冇咗個F字。原post傳送門