香港小姐競選準決賽｜台下師姐盛裝出席仲養顏 關禮傑與關楓馨四手聯彈被指唔公平

無綫噚晚（23日）舉行《We Miss Hong Kong 香港小姐競選準決賽》，由錢嘉樂率領丁子朗、黃庭鋒、周嘉洛、吳偉豪擔任司儀，20位佳麗喺師姐導師帶領下施展渾身解數爭取12強席位。今屆港姐討論度唔想太高，相信唔少人連佳麗個樣同名都未必認得晒。睇完成個騷後，網民都有唔同意見，而家就同大家睇下啦！

台下師姐仲養顏
噚晚嘅選美晚會可以話係星光熠熠，歷屆港姐都盛裝出席支持一班佳麗，例如馮盈盈、陳庭欣、簡淑兒、蘇韻姿、陳曉華、朱晨麗、張秀文、何依婷及謝嘉怡等等，呢班師姐們實在太耀眼，連台上佳麗嘅光芒都被遮蓋，大讚師姐們靚過晒一班佳麗，例如「fyy同regina超咗班」、「朱晨麗靚x過晒隔離班囡」、「今晚係咪最主要俾人睇返以前港姐有幾正」、「認真3e今年選會贏」、「​​今晚miss HK 我睇好何依婷丶陳庭欣」及「Regina全場最白又show腳」等等。

才藝表演好尷尬
早前佳麗們已經分成、綠、橙及粉紅4組，噚晚喺師姐領隊下進行才藝表演，不過佢哋嘅表現就睇到網民好尷尬，紛紛留言話：「小學生都做得好過佢地」、「小學開放日表演可能都好過佢地。」、「啲表演睇到好x尷尬 個個都走x哂音做乜x」、「啲表演好難頂」及「年年才藝表演都係最onX最虐待」等等。

關禮傑參與囡囡演出唔公平
由關禮傑大女關楓馨（Fabienne）、邵初、施茉莉及梁菁琳組成嘅紅組，喺才藝環節中表演小型音樂劇，而關楓馨就與關禮傑四手聯彈，雖然表演搶鏡，不過就惹來大細超之嫌，點解佢哋可以父女檔上陣，對其他佳麗唔公平，留言話：「公平咩，出關禮傑」、「出關禮 犯哂規」、「造馬出晒面................點解可以搵老豆出黎表演?」、「好似吾係好公平咁喎 4號 play piano 有亞爸坐隔離助威」、「靠關係，真係好羞家」及「呢個世界一直都存在特權架喇 好正常」等等。

泳裝「包到上心口」冇睇頭
泳裝一向係觀眾最期待嘅環節，今年佳麗嘅泳裝被往年密實，唔少網民都表示失望，例如「唔係吖嘛？泳裝包住曬個胸嘅！」、「泳裝咁嘅？」、「搞咩呀？！係咪要留返下次」及「啲泳衣咁保守，完全冇睇頭」等等。

專揀靚佳麗淘汰？
噚晚20為佳麗力爭躋身終極12強，當中大熱嘅陳聖瑜及關楓馨順利入圍，不過亦有大熱靚女佳麗遭淘汰，有網民就話唔明淘汰準則，點解專揀靚佳麗去淘汰，紛紛留言話：「咁多扒唔foul foul呢啲」、「專揀靚嗰啲嚟 foul」、「噢，16號唔係大熱咩」、「靚嗰兩個淘汰，個鬼妹咁樣衰就留低」「點解靚既foul哂？係咪冇得再玩」、「專揀靚嘅淘汰」、「17號算養眼喎 咁都out」、「淘汰準則係乜 痴線」、「淘汰哂d靚女點搞」及「做咩foul哂d靚女」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！