【香港愛情故事】白彪做勻五間電視台 後生食過白粉冇學壞 三度演郭靖家傳戶曉

TVB推出新劇《香港愛情故事》迎戰Viu TV來勢洶洶嘅《全民造星》，嘗試貼地刻劃香港人嘅感情生活。劇中幾對愛侶都有唔錯嘅發揮，而飾演陳子朗、陳子欣、陳子婷三兄妹父母嘅白彪，將角色嘅口衰大男人性格演得出色。不過彪叔嘅代表作，竟然係喺唔同年代3套《射鵰英雄傳》／《神鵰俠侶》演金庸筆下嘅大俠郭靖。

白彪原名劉國榮，喺屋企十二兄弟姊妹之中排第八，去年獲香港電影金像獎「專業精神獎」嘅魚頭允（劉允）係彪叔對落一級嘅細佬，兩兄弟都係做武師入行。

彪叔喺一個訪問提到童年家境貧窮，喺紅磡住鐵皮屋，十幾歲嘅時候成日都喺品流複習嘅球場流連，試過跟人偷嘢、打交同講數，甚至有人俾白粉佢試，好在彪叔覺得難聞先冇上癮。本身有習武嘅彪叔19歲入讀邵氏訓練班，用一年時間學做武打演員，起初做龍虎武師同替身，為咗爭取機會，即使冇咩安全措施之下要三樓跳落街都頂硬上。當時港產武打片喺韓國大熱，彪叔就試過去當地拍戲2年。

後來白彪有機會轉型做演員，佳視搵佢拍《射鵰英雄傳》做郭靖，打開闖進電視圈之路。後來佳視以及90年代TVB拍嘅《神鵰俠侶》都搵彪叔演郭靖，令佢成為第一位三度擔演郭靖嘅演員，喺內地具有人氣，得到唔少登台機會。

彪叔入行五十幾年，做勻佳視、TVB、亞視（麗的），近年又拍過港視同Viu TV劇集，應該係行內少數做齊5間電視台嘅演員。1990年彪叔因為政治環境而舉家移民加拿大，但係間中會做「太空人」返香港拍劇搵食。即使年過70，彪叔舊年簽約邵氏後仍然劇接劇，早排有眼利網民留意到，TVB 同一晚嘅4線劇集（《愛·回家之開心速遞》、《使徒行者3》、《踩過界II》及《香港愛情故事》）都有彪叔出現，被戲稱「白彪之夜」。比起老友羅樂林「一晚死5次」嘅紀錄，彪叔呢個好意頭得多！