雅虎香港新聞 《香港愛情故事》鍾雪瑩盞鬼演出獲關注 演戲填詞做DJ冇嘢難到佢
早兩日播出大結局嘅小品愛情劇《香港愛情故事》，搵嚟唔少年輕新演員參與，令觀眾非常有新鮮感。除咗游嘉欣、徐文浩、林正峰及劉子碩之外，仲有飾演邱凱傑（林正峰飾）「7折出租女友」西西利嘅新晉演員鍾雪瑩（Cherrie）。戲份唔多嘅鍾雪瑩，喺第八集以學生妹打扮與邱凱傑喺郊野公園見面，仲串串貢咁講出交易條件及用激將法令邱凱傑發現自己嘅優點。之後佢哋成為朋友，西西利更鼓勵邱凱傑嘗試做想做嘅事。一心成為韓國女團成員嘅西西利，兩次都係跳住舞咁離開。鍾雪瑩憑住劇中精警對白及盞鬼演出，演得夠放嘅佢成功吸引觀眾留意。
現年26歲嘅鍾雪瑩，就讀香港浸會大學傳理系，畢業後加入商台叱咤903做DJ，直至今年3月離開商台。鍾雪瑩同劇中嘅西西利都有一個歌星夢，所以喺15歲嘅時候已經參加《亞洲星光大道3》，希望可以成為歌手，不過當時表現麻麻，落敗後就專心讀書。其實除咗《香港愛情故事》之外，鍾雪瑩都有其他演出機會，例如ViuTV劇集《教束》、電影《媽媽的神奇小子》、《殺出個黃昏》、陳健安《時光邊緣的人》MV及陳奕迅《致明日的舞》MV等等。另外，佢亦識得填詞，好似有ERROR《殺死我的經理人》、陳凱詠《天生二品》及《想正常》等等，真係集多項才能於一身呀！
按此下載全新應用程式Yahoo APP，並以Yahoo電郵免費登記成為會員，即時可完成簡單任務賺取Ypoints，憑分即可換領不同獎賞！ 新人更可即時換領限量新人禮，立即下載！
