【香港行山】鮮為人知荃灣古蹟 青龍頭圓墩村半日遊

Yahoo 旅遊
【香港行山】鮮為人知荃灣古蹟 青龍頭圓墩村半日遊
【香港行山】鮮為人知荃灣古蹟 青龍頭圓墩村半日遊

香港高樓大廈嘅正面,其實有住豐富歷史,當然好多更係鮮為人知,甚至就快散失及遺忘。今日介紹大家去行嘅就係荃灣青龍頭一條古村「圓墩村」,為法定古蹟,大家可以半日時間就探訪到古蹟兼行山睇風景!

歷史背景:客家古村

圓墩村為香港一條客家古村,建立於1780年,高峰時有300多位居民,靠種田、打魚生活,現址為舊有廢棄村莊,已屬本地法定古蹟,為三級歷史建築。當年好多人經元荃古道往來,都會於圓墩村休息;後來城市化後途人漸少,最後村民都移居新村莊。目前古村變為圓墩博物館,由民安隊管理。

圓墩村有300多年歷史,為本地客家古村莊。
圓墩村有300多年歷史,為本地客家古村莊。

荃灣出發小巴直達青龍頭

起點大家可以從荃灣政府停車場出發,先於荃豐廣場附近補給糧水或進食,再乘坐96M小巴,直達青龍頭總站。一落車,附近就已經係圓墩村一個村牌坊,非常易搵,此處就係圓墩村新村。兩邊寫上對聯「逢迎遠近逍遙過,進退連還達道通」,特別之處在於全部字都用「撐艇仔」邊!順帶一提,起步點有一個相當乾淨嘅公廁,可以先放低幾両再出發。

途中會經過屯門公路橋底,從下望上去非常壯觀。
途中會經過屯門公路橋底,從下望上去非常壯觀。

經過屯門公路之下

公廁外就係龍如路,大家只要沿住龍如路上斜行,途中穿過屯門公路底下,大概行20分鐘就會進入大欖郊野公園燒烤場,有洗手間有長櫈,可以休息飲水。然後左轉進入引水道,沿途可以外望屯門公路及遠眺青馬大橋、汀九橋、馬灣都可以望到。另外仲會見到幾條八角形柱於山坡,唔好以為係風水陣,原來防止山泥傾瀉嘅鞏固裝置。大約行15分鐘,就會見到分岔路,請往右手邊行直上樓梯。

未到村之前會到達大欖郊野公園燒烤場。
未到村之前會到達大欖郊野公園燒烤場。

樓梯直上圓墩村

樓梯雖然左右無欄杆,不過尚算工整闊落,都唔算難行,直上約15分鐘就會去到圓墩村舊址。已有300多年歷史嘅古村,好彩有政府定時維修,一排古村居尚算穩陣,雖然好大部分已經拆毀,但餘下嘅都可以睇到呢條客家古村當年嘅繁盛。此處為山谷位,有一大片廣闊草原,可以話深山之中別有洞天,仲不時有牛群出沒食草。

石梯尚算工整易行,亦有樹蔭。
石梯尚算工整易行,亦有樹蔭。
圓墩村為三級歷史建築,為法定古蹟。
圓墩村為三級歷史建築,為法定古蹟。

離開往深井方向

往圓墩村出口方向走,中途會經過一個小庭園,小橋及池水,加上綠蔭之下,可以再影相打卡。之後見到分岔路就往「青龍頭」方向,中途經過一個管制站,又見到一個分岔口,請往右手邊上斜,就係深井方向。一直走就會見到旁邊有條石級落下面,再行大約15分鐘,途中見到廢棄嘅深井公立學校牌坊,然後就抵達深井,大可再食個飯然後坐車離開!

經過深井公立學校牌坊,就落到深井。
經過深井公立學校牌坊,就落到深井。
路線
路線

路線:青龍頭總站>龍如路>大欖郊野公園燒烤場>圓墩村古蹟>深井

全程:約7公里

需時:2.5小時(連休息及參觀時間)

難度:初級

來回交通:荃灣96M小巴直達青龍頭


【立即讚好】全新 Yahoo 旅遊 Facebook 專頁

Yahoo 旅遊以全新樣貌登場,Facebook 專頁當然同時煥然一新!立即讚好,每日睇盡旅遊新資訊!

你可能還想看